കെ കെ രമയ്ക്കും സംഘപരിവാറിനും ഒരേ സമര രീതിയെന്ന് മുഖ്യമന്ത്രി

തിരുവനന്തപുരം: ആര്‍ എം പി നേതാവ് കെ കെ രമയുടേയും സംഘപരിവാറിന്റേയും സമര രീതി ഒന്നാണെന് മുഖ്യമന്ത്രി പിണറായി വിജയന്‍. കെ കെ രമ ഡല്‍ഹിയില്‍ സമരം നടത്തിയത് കേരളത്തെക്കുറിച്ച് തെറ്റായ പ്രചാരണം നടത്താനാണ്.

സംഘപരിവാറും അത്തരത്തിലുള്ള സമരമാണ് നടത്തുന്നതെന്നും മുഖ്യമന്ത്രി പറഞ്ഞു. വടകര ഒഞ്ചിയത്ത് സി പി എം പ്രവര്‍ത്തകര്‍ വ്യാപകമായി അക്രമം അഴിച്ചുവിടുന്നുവെന്ന് ചൂണ്ടിക്കാട്ടി കുറ്റ്യാടി എം.എല്‍.എ പാറക്കല്‍ അബ്ദുള്ള നല്‍കിയ അടിയന്തര പ്രമേയത്തിന് നിയമസഭയില്‍ മറുപടി പറയുകയായിരുന്നു മുഖ്യമന്ത്രി.

ആര്‍ എം.പി, ലീഗ്, കോണ്‍ഗ്രസ് പ്രവര്‍ത്തകര്‍ക്ക് നേരെ വടകരയില്‍ സി.പി.എം പ്രവര്‍ത്തകര്‍ വ്യാപക അക്രമം അഴിച്ചുവിടുകയാണെന്നും ആര്‍ എം.പി പ്രവര്‍ത്തകരെ കള്ളക്കേസില്‍ കടുക്കുന്നുവെന്നും പാറക്കല്‍ അബ്ദുള്ള അടിയന്തര പ്രമേയത്തില്‍ ആരോപിച്ചു.