മുന്നണി മാറ്റം ആലോചിച്ചിട്ടില്ലെന്ന് കെ എം മാണി

കോട്ടയം: യു.ഡി.എഫില്‍ നിന്ന് പുറത്തുപോകുന്ന കാര്യം കേരളാ കോണ്‍ഗ്രസ് ആലോചിച്ചിട്ടില്ലെന്നും ഇപ്പോള്‍ അതിനുള്ള സാഹചര്യമില്ലെന്നും കെ.എം മാണി. എൻഡിഎ യിലേക്ക് പോകുമോ എന്ന ചോദ്യത്തിൽ ആവശ്യക്കാർ ഇങ്ങോട്ടുവരുമെന്നും ആങ്ങോട്ട് ചെല്ലേണ്ട കാര്യമില്ലെന്നുമായിരുന്നു മാണിയുടെ മറുപടി.

യു.ഡി.എഫ് വിടണമെന്ന പാര്‍ട്ടി സ്റ്റിയറിംഗ് കമ്മിറ്റി തീരുമാനത്തോട് പ്രതികരിക്കുകയായിരുന്നു അദ്ദേഹം. "പാർട്ടിയിൽ പല അഭിപ്രായങ്ങൾ ഉണ്ടാകുന്നത് സ്വാഭാവികമാണ്. വിമർശനാത്മക ചർച്ചകളാണ് സ്റ്റിയറിംഗ് കമ്മറ്റിയിൽ നടന്നത്." എന്നാൽ യുഡിഎഫിൽ പൂർണമായ തൃപ്തിയില്ലെന്നും മാണി കൂട്ടിച്ചേർത്തു. യു.ഡി.എഫ് വിടണമെന്ന് പാര്‍ട്ടി സ്റ്റിയറിംഗ് കമ്മിറ്റി യോഗത്തില്‍ അഭിപ്രായമുയര്‍ന്നിരുന്നു. യോഗത്തില്‍ പങ്കെടുത്ത ഭൂരിപക്ഷം നേതാക്കളും ഇതേ അഭിപ്രായമാണ് പ്രകടിപ്പിച്ചത്. കോണ്‍ഗ്രസ് വഞ്ചിച്ചുവെന്നും യു.ഡി.എഫ് വഞ്ചകരുടെ ഒരു കൂട്ടമായി മാറിയെന്നും യോഗം കുറ്റപ്പെടുത്തി.