ഹര്‍ത്താൽ പട്ടിണിയ്ക്കിട്ട അയ്യപ്പഭക്തര്‍ക്ക് ഭക്ഷണവുമായി കേരള പോലീസ്

കൊച്ചി: ബിജെപിയുടെ അപ്രതീക്ഷിത ഹര്‍ത്താലിൽ വലഞ്ഞ അയ്യപ്പഭക്തര്‍ക്ക് പ്രഭാതഭക്ഷണമൊരുക്കി കൊച്ചി സിറ്റി പോലീസ്. എറണാകുളം സൗത്ത് റയിൽവേ സ്റ്റേഷനിൽ എത്തിയ ഇതരസംസ്ഥാനക്കാരായ ഭക്തര്‍ക്കാണ് പോലീസ് ഭക്ഷണം നല്‍കിയത്.

നഗരത്തിലെ ക്രമസമാധാനപാലന ചുമതലയുള്ള ഉദ്യോഗസ്ഥരാണ് അയ്യപ്പ ഭക്തരുടെ വിശപ്പകറ്റാൻ എത്തിയത്.ദക്ഷിണേന്ത്യൻ സംസ്ഥാനങ്ങളിൽ നിന്ന് ട്രെയിനിൽ എത്തിയ ഭക്തര്‍ക്ക് പോലീസ് ഭക്ഷണപ്പൊതികള്‍ കൈമാറുകയായിരുന്നു. പോലീസുകാരിൽ നിന്ന് തന്നെ സ്വരൂപിച്ച പണം ഉപയോഗിച്ച് പോലീസ് ക്യാൻ്റീനിൽ തയ്യാറാക്കിയ ഭക്ഷണമാണ് അയ്യപ്പഭക്തര്‍ക്ക് നല്‍കിയത്.

അതേസമയം, ഹര്‍ത്താല്‍ ദിനത്തിലും ശബരിമല തീര്‍ത്ഥാടനം തടസ്സമില്ലാതെ നടക്കുന്നുണ്ടെന്നാണ് റിപ്പോര്‍ട്ടുകള്‍. ശബരിമല തീര്‍ത്ഥാടകരുടെ സൗകര്യം പരിഗണിച്ച് എരുമേലി ടൗണിനെയും പരിസരങ്ങളെയും ഹര്‍ത്താലിൽ നിന്ന് ഒഴിവാക്കിയിരുന്നു.