കൊച്ചി മെട്രോ; പ്രതിമാസ നഷ്ടം 6.60 കോടി

കൊച്ചി മെട്രോക്ക് ദിനംപ്രതി ലക്ഷങ്ങളുടെ നഷ്ടമെന്ന് റിപ്പോർട്ട്. ഒരു മാസം 6.60 കോടി രൂപയുടെ നഷ്ടമാണ് കൊച്ചി മെട്രോയ്ക്കുള്ളത്. വരവും ചെലവും തമ്മിൽ പ്രതിദിനം തന്നെയുള്ള അന്തരം 22 ലക്ഷം രൂപയാണ്. മെട്രോയോട് സർക്കാർ കാണിക്കുന്ന അലംഭാവവും നഷ്ടത്തിന് കാരണമായി ചൂണ്ടിക്കാണിക്കുന്നത്.

പ്രതിദിന ടിക്കറ്റ് കലക്ഷൻ 12 ലക്ഷം രൂപയാണ്. ടിക്കറ്റ് ഇതര വരുമാനം 5.16 ലക്ഷം രൂപയും. അതേസമയം ഒരു ദിവസത്തെ നടത്തിപ്പ് ചെലവ് 38 ലക്ഷമാണ്. ഇന്ത്യയിലെ മറ്റ് മെട്രോകൾക്ക് സമാനമാണ് ടിക്കറ്റ് വരുമാനത്തിലെ ഈ അന്തരം. മൂന്നും നാലും വർഷം കൊണ്ടാണ് രാജ്യത്തെ പല മെട്രോകളും നഷ്ടത്തിൽ നിന്ന് കരകയറിയത്. ഇതും ടിക്കറ്റ് ഇതര വരുമാനത്തിലൂടെയാണ് ലാഭമുണ്ടാക്കുന്നത്.

അതേസമയം കൊച്ചി മെട്രോയിൽ ടിക്കറ്റ് ഇതര വരുമാനത്തിലൂടെ ലാഭം കണ്ടെത്താനുള്ള പദ്ധതി നടപ്പാക്കാൻ സർക്കാർ അലംഭാവം കാണിക്കുകയാണ്. കാക്കനാട് എൻജിഒ ക്വാർട്ടേഴ്‌സിൽ മെട്രോ ടൗൺഷിപ്പ് പദ്ധതിക്കായി 17 ഏക്കർ സ്ഥലം കൈമാറാനുള്ള തീരുമാനമായിട്ട് ഒന്നര വർഷം കഴിഞ്ഞിട്ടുമുണ്ട്.