വൃത്തി എന്തെന്ന് കണ്ടു പഠിച്ചുകൂടേ ബ്ലാസ്റ്റേഴ്‍‍സ് ആരാധകരേ?

ഫുട്ബോള്‍ മത്സരങ്ങള്‍ ഉണ്ടെങ്കിലും ഇല്ലെങ്കിലും കൊച്ചി നഗരത്തിന്‍റെ ശ്വാസകോശങ്ങളിലൊന്നാണ് കലൂര്‍ ജവഹര്‍ലാൽ നെഹ്രു സ്റ്റേഡിയവും പരിസരങ്ങളും. പകൽ മുഴുവൻ ഓഫീസിലെ വീര്‍പ്പുമുട്ടലും നഗരത്തിലെ പുകയും പൊടിയും ഒഴിവാക്കി അൽപസമയം ചെലവഴിക്കാൻ കൊച്ചിക്കാര്‍ക്കുള്ള ചുരുക്കം ചിലയിടങ്ങളിലൊന്നുകൂടിയാണ് അന്താരാഷ്ട്ര സ്റ്റേഡിയത്തിന്‍റെ പരിസരം. പൊതുവെ വൃത്തിയായി പരിപാലിക്കപ്പെടുന്ന സ്റ്റേഡിയവും പരിസരവും ഐഎസ്എൽ മത്സരപ്പിറ്റേന്ന് മാലിന്യക്കൂമ്പാരമായി മാറുന്നതാണ് കാഴ്ച


ഐഎസ്എൽ അഞ്ചാം സീസണിലെ കേരള ബ്ലാസ്റ്റേഴ്സിന്‍റെ ആദ്യ ഹോം മത്സരത്തിനു ശേഷവും കഥ മറ്റൊന്നല്ല. സ്റ്റേഡിയത്തിനു ചുറ്റുമുള്ള റിങ് റോഡും പരിസരങ്ങളും പ്ലാസ്റ്റിക് കുപ്പികള്‍, ഭക്ഷണപ്പൊതികള്‍, റിബണുകള്‍, പ്ലാസ്റ്റിക് കവറുകള്‍ എന്നിങ്ങനെ നാനാവിധ മാലിന്യങ്ങള്‍ കൊണ്ട് നിറഞ്ഞിരിക്കുകയാണ്.

ഒരൊറ്റ മത്സരം കൊണ്ട് ഇത്രയും മാലിന്യം സ്റ്റേഡിയത്തിലേയ്ക്ക് എത്തുമെങ്കിൽ സീസൺ തീരുമ്പോഴേയ്ക്കും എത്തുന്ന മാലിന്യത്തിന്‍റെ അളവെത്രയെന്ന് ചോദിക്കുകയാണ് കൊച്ചി നിവാസിയും പത്രപ്രവര്‍ത്തകയുമായ അഞ്ജന ജോര്‍ജ്. മനുഷ്യന്‍റെ ഇടപെടലുകള്‍ കൊണ്ട് ഒരു മഹാദുരന്തം കേരളത്തെ നശിപ്പിച്ച് കടന്നു പോയിട്ട് ആഴ്ചകള്‍ കഴിയും മുൻപാണ് വീണ്ടും മാലിന്യനിക്ഷേപം.



എന്നാൽ കളിയാവേശത്തിനിടെ പരിസരശുചീകരണം നടപ്പിലാകാത്ത കാര്യമാണെന്ന് പുച്ഛിച്ചു തള്ളാൻ വരട്ടെ. ബെൽജിയവുമായുള്ള ലോകകപ്പ് തോൽവിയ്ക്ക് ശേഷം ജപ്പാൻ ആരാധകര്‍ സ്റ്റേഡിയവും പരിസരവും വൃത്തിയാക്കുന്ന കാഴ്ച കേരളത്തിലും വൈറലായിരുന്നു. മത്സരങ്ങള്‍ക്ക് ശേഷം വേദി വൃത്തിയാക്കുന്നത് ജപ്പാൻകാരുടെ പതിവുശീലങ്ങളിൽ ഒന്നാണ്. ലോകകപ്പ് ആസ്വദിക്കാനായി റഷ്യയിലെ ഫുട്ബോള്‍ വേദികളിലെല്ലാം ജപ്പാൻകാര്‍ ഈ ശീലം പ്രാവര്‍ത്തികമാക്കി. ടൂര്‍ണമെന്‍റിൽ അവസാന ഏഷ്യൻ ടീമായി പിടിച്ചു നിന്ന ശേഷം ബെൽജിയത്തോട് തോറ്റ് പുറത്തു പോകുമ്പോഴും അവര്‍ ഈ ശീലം കൈവിട്ടില്ലെന്ന് അറിയുമ്പോഴാണ് കളിയാവേശത്തിനൊപ്പം നിൽക്കുന്നതാണ് ജപ്പാൻകാര്‍ക്ക് പരിസ്ഥിതിയോടുള്ള കരുതൽ എന്ന് മനസ്സിലാകുക.

ഇനിയുള്ള മത്സരങ്ങളിലെങ്കിലും പുറത്തുപോകുമ്പോള്‍ സ്റ്റേഡിയം വൃത്തിയാക്കിയിട്ടു കൂടി പോകാനുള്ള ശീലം കൂടി മഞ്ഞപ്പടയ്ക്ക് ഉണ്ടാകണമെന്ന് ഓര്‍മിപ്പിക്കുകയാണ് പരിസ്ഥിതിസ്നേഹികള്‍. ടീം തോറ്റാലും ജയിച്ചാലും മലയാളികള്‍ എന്ന നിലയിൽ രാജ്യത്തിന് മുഴുവൻ മാതൃകയായാകാനുള്ള മറ്റൊരു അവസരം കൂടിയാകും അത് ബ്ലാസ്റ്റേഴ്സ് ആരാധകര്‍ക്ക്.