യുഡിഎഫ് സംഘം എന്തുകൊണ്ട് മല കയറിയില്ലെന്ന് കോടിയേരി

തിരുവനന്തപുരം: പമ്പ വരെയെത്തിയ യുഡിഎഫ് നേതാക്കള്‍ പൊലീസ് അനുവദിച്ചിട്ടും എന്തുകൊണ്ട് ശബരിമല കയറിയില്ലെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. ശബരിമലയിലേക്ക് ആര്‍ക്കും പോകാനാവില്ലെന്ന് പറഞ്ഞ് ആളുകളെ തെറ്റിദ്ധരിപ്പിക്കാനായിരുന്നു യുഡിഎഫ് ശ്രമം. എന്നാല്‍ ഇവരെ ആരും തടഞ്ഞില്ല. പമ്പ വരെ എത്തിയിട്ടും നേതാക്കള്‍ ശബരിമല കയറാതെ മടങ്ങിയത് എന്തേയെന്നും കോടിയേരി ചോദിച്ചു. നിലയ്ക്കലില്‍ യുഡിഎഫ് നേതാക്കള്‍ നടത്തിയ സമരത്തെയും കോടിയേരി ബാലകൃഷ്ണന്‍ വിമര്‍ശിച്ചു.

ശബരിമലയില്‍ ആകെ കുഴപ്പമാണ് എന്ന് വരുത്തിത്തീര്‍ക്കുകയായിരുന്നു യുഡിഎഫിന്‍റെ ലക്ഷ്യം. ഭക്തരെ തടയുന്നു എന്ന പേരില്‍ നിരോധനാജ്ഞ ലംഘിച്ചുകൊണ്ട് നിലയ്ക്കലിലും പമ്പയിലും പ്രതിഷേധം സംഘടിപ്പിച്ചു. എന്നാല്‍ ശബരിമലയിലേക്ക് പോകാന്‍ പൊലീസ് ഇവര്‍ക്ക് യഥേഷ്ടം അനുമതി നല്‍കി. എന്നിട്ട് എന്തുകൊണ്ട് സന്നിധാനത്തേക്ക് പോയില്ലെന്നും ഇവരെ ആരെങ്കിലും തടഞ്ഞതുകൊണ്ടാണോ പോകാതിരുന്നതെന്നും കോടിയേരി ചോദിച്ചു. തിരുവനന്തപുരത്ത് നടത്തിയ വാര്‍ത്താസമ്മേളനത്തിലായിരുന്നു കോടിയേരിയും വിമര്‍ശനം.