ശബരിമലയെ സംഘര്‍ഷ ഭൂമിയാക്കരുതെന്ന് കോടിയേരി

തിരുവനന്തപുരം: ശബരിമല സംഘര്‍ഷ ഭൂമിയാക്കി മാറ്റരുതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. ഇടതുപക്ഷ മുന്നണി ഒരാളുടെയും വിശ്വാസത്തിനും എതിരല്ല. ഈ വിധിയെ ഒരു ആയുധമാക്കിമാറ്റേണ്ടതല്ലെന്നും കോടിയേരി പറഞ്ഞു.

സുപ്രീംകോടതി വിധി നടപ്പാക്കേണ്ടത് ഭരണകൂടത്തിന്‍റെ കടമയാണ്. ഇതില്‍ ഏതെങ്കിലും പാര്‍ട്ടിക്കാര്‍ക്ക് എതിര്‍പ്പുണ്ടെങ്കില്‍ സുപ്രീംകോടതിയില്‍ തന്നെ റിവ്യൂ ഹര്‍ജി സമര്‍പ്പിച്ച് ഇടപെടുകയാണ് ചെയ്യേണ്ടത്. ബിജെപിയും കോണ്‍ഗ്രസും വിശ്വാസികളെ ഇളക്കിവിട്ട് സമരം ചെയ്യുകയല്ല വേണ്ടത്. നിയമപരമായി മുന്നോട്ടു പോകുകയാണ് വേണ്ടിയിരുന്നതെന്നും കോടിയേരി പറഞ്ഞു.

ശബരിമല വിഷയം രാഷ്ട്രീയ സമരമായി മാറിയിരിക്കുന്നു. മഹാരാഷ്ട്രയിലെ ശനീശ്വര ക്ഷേത്രത്തിലും ഹാജി അലി ദര്‍ഗയിലും ബിജെപി സര്‍ക്കാര്‍ സ്ത്രീകള്‍ക്ക് പ്രവേശനം അനുവദിച്ചു. ഇതില്‍ ആരും സമരം ചെയ്യാന്‍ രംഗത്തു വന്നിട്ടില്ല. കേരളത്തില്‍ കലാപാന്തരീക്ഷം സൃഷ്ടിക്കാനാണ് ഇവര്‍ ശ്രമിക്കുന്നതെന്നും കോടിയേരി ആരോപിച്ചു.