കോടിയേരി ബാലകൃഷ്ണൻ രാജി വെക്കേണ്ടതില്ലെന്ന് കേന്ദ്ര നേതൃത്വം

തിരുവനന്തപുരം: ബിനോയ് കൊടിയേരിക്കെതിരെ ആരോപണം ഉയർന്ന സാഹചര്യത്തിൽ സിപിഎം സംസ്ഥാന സമിതിയോഗത്തിൽ രാജി സന്നദ്ധത അറിയിച്ചിരുന്നെന്ന് വിവരം. കോടിയേരി രാജിക്കത്തുമായാണ് യോഗത്തിന് എത്തിയതെന്നാണ് സൂചന. രാവിലെ ഔദ്യോഗിക പദവി ഒഴിയുന്ന കാര്യം കോടിയേരി ബാലകൃഷ്ണൻ മുഖ്യമന്ത്രിയുമായി ചർച്ച ചെയ്തിരുന്നു.എന്നാൽ, കോടിയേരി ഇപ്പോൾ രാജി വെക്കേണ്ടതില്ലെന്നാണ് സംസ്ഥാന ഘടകത്തിന്റെ നിലപാട്. കോടിയേരി തന്നെയാണ് ഇന്ന് ചേർന്ന സംസ്ഥാന സമിതിയിൽ വിഷയം റിപ്പോർട്ട് ചെയ്തത്. പാർട്ടി യോഗത്തിൽ ബിനോയിക്ക് എതിരായി ഉയർന്ന ആരോപണവും ബിനോയി ഒളിവിൽ പോയ സാഹചര്യവും വിശദമായി ചർച്ച ചെയ്തു.

ബിനോയ് കോടിയേരിയുടെ വിഷയത്തിൽ കോടിയേരി രാജി വെക്കില്ലെന്ന് കേന്ദ്ര സിപിഎം നേതൃത്വവും വ്യക്തമാക്കി. കോടിയേരി രാജി സന്നദ്ധത അറിയിച്ചെന്ന വാദം കേന്ദ്രനേതൃത്വം തള്ളി. അതെ സമയം, കേസ് ബിനോയ് കോടിയേരി തന്നെ നേരിടുമെന്ന് കോടിയേരി ബാലകൃഷ്ണൻ വ്യക്തമാക്കി. താൻ കുറ്റക്കാരനല്ലെന്ന് തെളിയിക്കേണ്ടത് ബിനോയിയുടെ മാത്രം ഉത്തരവാദിത്തമാണെന്നും കോടിയേരി വാർത്താസമ്മേളനത്തിൽ പറഞ്ഞു.