ജലീലിനെതിരെയുള്ള ആരോപണങ്ങള്‍ രാഷ്ട്രീയ പ്രേരിതമെന്ന് കോടിയേരി

കോഴിക്കോട്: സംസ്ഥാന ന്യൂനപക്ഷ ധനകാര്യ കോര്‍പ്പറേഷനില്‍ അനധികൃതമായി ബന്ധുവിനെ നിയമിച്ചെന്ന വിവാദത്തില്‍ മന്ത്രി കെടി ജലീലിനെ പിന്തുണച്ച് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. ജലീലിനെതിരെ ഉയര്‍ന്ന ആരോപണങ്ങള്‍ രാഷ്ട്രീയ പ്രേരിതമാണെന്നും കോടിയേരി പറഞ്ഞു.

ജലീലിനെതിരെ നടക്കുന്നത് വ്യക്തിഹത്യയാണ്. അദ്ദേഹം തെറ്റുചെയ്തെന്ന് പാര്‍ട്ടി കരുതുന്നില്ല. അതിനാല്‍ അന്വേഷണം നടത്തേണ്ട ആവശ്യമില്ലെന്നും കോടിയേരി വ്യക്തമാക്കി.

Read More: ഇടതുമുന്നണി സര്‍ക്കാര്‍ അഴിമതി സര്‍ക്കാരായി മാറിയെന്ന് ചെന്നിത്തല

ഇന്നലെ സിപിഎം സംസഥാന സെക്രട്ടറിയേറ്റും ജലീലിന് പിന്തുണ പ്രഖ്യാപിച്ചിരുന്നു. നിയമനത്തില്‍ തെറ്റ് പറ്റിയിട്ടില്ലെന്നും പരാതിയുള്ളവര്‍ക്ക് കോടതിയില്‍ പോകാമെന്നും സെക്രട്ടേറിയറ്റ് വ്യക്തമാക്കിയിട്ടുണ്ട്.

സംസ്ഥാന ന്യൂനപക്ഷ ധനകാര്യ കോര്‍പ്പറേഷനില്‍ യോഗ്യതയില്‍ ഇളവ് വരുത്തി പിതൃസഹോദര പുത്രനെ അനധികൃതമായി നിയമിച്ചു എന്നാണ് മന്ത്രിക്കെതിരായ ആരോപണം. യൂത്ത് ലീഗ് നേതാവ് പികെ ഫിറോസാണ് മന്ത്രിക്കെതിരെ ആരോപണവുമായി രംഗത്തെത്തിയത്. അതേസമയം നിയമനവുമായി ബന്ധപ്പെട്ട് അനധികൃതമായി ഒന്നും ചെയ്തിട്ടില്ലെന്നും നിയമപരമായി മാത്രമാണ് നിയമനം നടന്നതെന്നും മന്ത്രി കെടി ജലീല്‍ നേരത്തേ വ്യക്തമാക്കിയിരുന്നു. ഇതിന് പിന്നാലെയാണ് പാര്‍ട്ടിയും ജലീലിന് പിന്തുണ പ്രഖ്യാപിച്ചിരിക്കുന്നത്.

Read More: മുസ്‍ലിം ലീഗിന് ദൈവം നൽകിയ ശിക്ഷയാണ് വിധിയെന്ന് കെ ടി ജലീൽ