ജെഡിയു തീരുമാനത്തെ സ്വാഗതം ചെയ്ത് കോടിയേരി

തിരുവനന്തപുരം: യുഡിഎഫ് വിടാനുള്ള ജെഡിയു തീരുമാനം നല്ലതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. ജെഡിയുവിന് മുന്നിൽ എൽഡിഎഫ് വാതിലുകൾ തുറന്നിട്ടിരിക്കുകയാണെന്നും കോടിയേരി പറഞ്ഞു. എൽഡിഎഫിന് മുന്നിൽ ജെഡിയു ഉപാധികളൊന്നും വെച്ചിട്ടില്ലെന്നും കോടിയേരി വ്യക്തമാക്കി. ഇടത് മുന്നണിയിലേക്ക് പോകാനുള്ള ജെഡിയു നേതൃത്വത്തിന്‍റെ തീരുമാനത്തിന് ഇന്നാണ് സംസ്ഥാന സെക്രട്ടേറിയേറ്റ് അംഗീകാരം നൽകിയത് .

14 ജില്ലാ പ്രസിഡന്‍റുമാര്‍ തീരുമാനത്തെ പിന്തുണച്ചു. ഏകകണ്ഠമായാണ് തീരുമാനം എടുത്തതെന്ന് പാർട്ടി ജനറൽ സെക്രട്ടറി വർഗീസ് ജോർജ് മാധ്യമങ്ങളോട് പറഞ്ഞു. ഇത് ഇടത് പ്രവേശനത്തിനുള്ള അനുയോജ്യമായ സമയമാണെന്ന് സംസ്ഥാന പ്രസിഡന്‍റ് എം. പി.വീരേന്ദ്രകുമാർ പ്രതികരിച്ചു. നാളെ നടക്കുന്ന സംസ്ഥാന കൗൺസിൽ വിഷയം ചർച്ച ചെയ്ത് അന്തിമ തീരുമാനം കൈക്കൊള്ളും. നേരത്തെ കെ.പി.മോഹനനും മനയത്ത് ചന്ദ്രനും എൽഡിഎഫ് പ്രവേശനത്തെ എതിർത്തിരുന്നു. എന്നാൽ അവരും ഇപ്പോൾ തീരുമാനത്തെ പിന്തുണച്ചിട്ടുണ്ട്.