കോഴിക്കോട് ബീച്ചിൽ കടൽപ്പാലം തകർന്നുവീണ് 13 പേർക്ക് പരിക്ക്

കോഴിക്കോട്: നവീകരിച്ച കോഴിക്കോട് സൗത്ത് ബീച്ചിൽ കടൽപ്പാലം തകർന്നുവീണ് 13 പേർക്ക് പരിക്കേറ്റു. എല്‍ദോ(23), റിയാസ്(25), ജിബീഷ്(29), സുമേഷ്(29), അനസ്(25), ശില്‍പ(24),അഷര്‍(24), സ്വരാജ്(22), ഫാസില്‍(21), , ഇജാസ്(21) റംഷാദ്(27), ഫാസില്‍(24), അബ്ദുള്‍ അലി(35) എന്നിവര്‍ക്കാണു പരുക്കേറ്റത്. ചൊവ്വാഴ്ച രാത്രി 7.45ഓടെയായിരുന്നു അപകടം.

ബീച്ചിലെത്തിയവർ കടൽപ്പാലത്തിൽ കയറിയപ്പോൾ ഒരു ഭാഗത്തെ സ്ലാബ് പൊട്ടിവീഴുകയായിരുന്നു. ലൈഫ് ഗാർഡിന്റെ നിർദ്ദേശം അവഗണിച്ച് പാലത്തിൽ കയറിയവരാണ് അപകടത്തിൽപ്പെട്ടത്. ഇവരെ ബീച്ച് ആശുപത്രിയിൽ പ്രവേശിപ്പിച്ചു. ഇതിൽ ശിൽപ്പയുടെ തലയ്ക്ക് പൊട്ടലേറ്റു. മറ്റുള്ളവർക്ക് നിസാര പരിക്കാണുള്ളത്.

Also read: തൃശൂരിൽ കഞ്ചാവുമായി എക്സൈസ് പിടികൂടിയ യുവാവ് കസ്റ്റഡിയിൽ മരിച്ചു

വൈകുന്നേരങ്ങളിൽ പാലത്തിന്റെ അടിയിൽ ആളുകൾ ഇരിക്കാറുണ്ടെന്ന് ദൃക്സാക്ഷികൾ പറഞ്ഞു. അപകടം നടന്ന സ്ഥലത്തെ കടൽ വെള്ളത്തിൽ രക്തം കണ്ടെന്ന് ദൃക്സാക്ഷികൾ പറഞ്ഞതിന്റെ അടിസ്ഥാനത്തിൽ ഫയർഫോഴ്സും പോലീസും സ്ലാബ് നീക്കം ചെയ്ത് രക്ഷാപ്രവർത്തനം നടത്തുകയാണ്.

ജെസിബി ഉപയോഗിച്ച് സ്ലാബുകൾ നീക്കം ചെയ്യാനായിരുന്നു പോലീസിന്റെ ആദ്യ ശ്രമം. എന്നാൽ ബീച്ചിലേക്ക് ജെസിബി എത്തിക്കാൻ സാധിക്കാത്തതിനാൽ കട്ടർ ഉപയോഗിച്ച് സ്ലാബുകൾ അറുത്തുമാറ്റാനാണ് രക്ഷാ പ്രവർത്തകരുടെ ശ്രമം. കളക്ടർ സാംബശിവ റാവു അടക്കമുള്ളവർ സ്ഥലത്തെത്തി.