കോഴിക്കോട് വീണ്ടും പുതിയ മോഡൽ എടിഎം തട്ടിപ്പ്

കോഴിക്കോട്: നഗരത്തെ ഞെട്ടിച്ച് വീണ്ടും പുതിയ മോഡൽ എടിഎം തട്ടിപ്പ്. സ്‌കിമ്മര്‍ ഉപയോഗിച്ചുള്ള എടിഎം തട്ടിപ്പിന് പിന്നാലെയാണ് കോഴിക്കോട് നഗരത്തെ സ്തംഭിപ്പിച്ച പുതിയ മോഡൽ എടിഎം തട്ടിപ്പ് അരങ്ങേറിയരിക്കുന്നത്. ഇത്തവണ കണക്ടിവിറ്റി വിച്ഛേദിച്ചും മെഷീന്‍ ഓഫാക്കിയുമായിരുന്നു തട്ടിപ്പ് നടത്തിയത്. കോഴിക്കോട് ആനിഹാള്‍ റോഡിലെ എസ്.ബി.ഐ. എ.ടി.എമ്മിലെ താല്‍ക്കാലിക് അക്കൗണ്ടില്‍ നിന്നാണ് പണം തട്ടിയെടുത്തത്. അതിനാല്‍ തന്നെ വിവരം പുറത്തറിഞ്ഞതും വൈകിയാണ്.

എ.ടി.എം. മെഷീനിലും നെറ്റ്‍വര്‍ക്കിലും കൃത്രിമം നടത്തി ആറുതവണയായി 1,49,000 രൂപയോളമാണ് പിന്‍വലിച്ചിട്ടുള്ലത്. സി.സി.ടി.വി. ദൃശ്യങ്ങളിൽ നിന്ന് സംശയാസ്പദമായ സാഹചര്യത്തില്‍ നാലുപേരെ കണ്ടെത്തിയിട്ടുണ്ട്. ഈ ക്ലിപ്പുകൾ സഹിതം ബ്രാഞ്ച് മാനേജര്‍ പരാതി നല്‍കിയതായി കോഴിക്കോട് ടൗണ്‍ എസ്.ഐ. കെ. ശംഭുനാഥ് വ്യക്തമാക്കി. പലതരം എ.ടി.എം. കാര്‍ഡുകള്‍ ഉപയോഗിച്ച് അക്കൗണ്ടുകളില്‍ നിന്ന് പണം പിന്‍വലിക്കുന്ന സമയത്ത് എ.ടി.എമ്മിന്‍റെ കണക്ടിവിറ്റി വിച്ഛേദിച്ച് മെഷീന്‍ ഓഫാക്കിയാണ് തട്ടിപ്പുനടത്തിയത്. പണമെത്തുന്ന സമയത്ത് മെഷീന്‍ ഓഫാക്കിയതിനാല്‍ വ്യക്തിഗത അക്കൗണ്ടുകള്‍ക്കു പകരം ബാങ്കിന്‍റെ താത്കാലിക അക്കൗണ്ടില്‍ നിന്നാണ് പണം നഷ്ടമായിരിക്കുന്നത്. അതിനാല്‍ ഇടപാടുകാരുടെ പണം നഷ്ടമായിട്ടില്ല. ബാങ്ക് അധികൃതര്‍ എ.ടി.എം. ഇടപാടുകളുടെ സ്റ്റേറ്റ്മെന്‍റ് പരിശോധിച്ചപ്പോഴാണ് ഈ തട്ടിപ്പ് പുറത്തായത്.