ശബരിമലയിൽ താൻ ആചാരം തെറ്റിച്ചിട്ടില്ലെന്ന് ശങ്കര്‍ദാസ്

തിരുവനന്തപുരം: ശബരിമലയിലെ ആചാരങ്ങള്‍ താൻ ലംഘിച്ചിട്ടില്ലെന്ന് ദേവസ്വം ബോര്‍ഡ് അംഗം കെ പി ശങ്കര്‍ദാസ്. ഇരുമുടിക്കെട്ടില്ലാതെ പതിനെട്ടാം പടി കയറുന്ന കെ പി ശങ്കര്‍ ദാസിന്‍റെ ദൃശ്യങ്ങള്‍ വിവാദമായിരുന്നു. എന്നാൽ ചടങ്ങിന്‍റെ ഭാഗമായാണ് താൻ പതിനെട്ടാംപടി കയറിയതെന്നും ആചാരവും ചടങ്ങും വ്യത്യസ്തമാണെന്നും ശങ്കര്‍ദാസ് പറഞ്ഞു.

അതേസമയം, ആര്‍എസ്എസ് നേതാവ് വത്സൻ തില്ലങ്കേരി നടത്തിയത് ആചാരലംഘനം തന്നെയാണെന്നും ശങ്കര്‍ദാസ് കൂട്ടിച്ചേര്‍ത്തു.

പടിപൂജ ഒരു ചടങ്ങുമാത്രമാണെന്നും ആഴി തെളിയിക്കാൻ പോയപ്പോള്‍ താൻ കൂടെ പോകുകയായിരുന്നുവെന്നും ശങ്കര്‍ ദാസ് പറഞ്ഞു. ദേവസ്വം ബോര്‍ഡ് പ്രതിനിധി എന്ന നിലയ്ക്ക് ബന്ധപ്പെട്ടവര്‍ ക്ഷണിച്ചതിന്‍റെ ഭാഗമായാണ് താൻ പോയതെന്നും ശങ്കര്‍ദാസ് പറഞ്ഞു. ഇത് എല്ലാ വര്‍ഷവും നടക്കുന്നതാണ്. വ്യക്തിപരമായ കാരണങ്ങളാലാണ് ദേവസ്വം ബോര്‍ഡ് പ്രസിഡന്‍റ് സന്നിധാനത്ത് എത്താതിരുന്നതെന്നും ശങ്കര്‍ദാസ് വ്യക്തമാക്കി.