കെപിസിസി യോഗത്തില്‍ നേതൃത്വത്തിനെതിരെ രൂക്ഷവിമര്‍ശനം

തിരുവനന്തപുരം: തെരഞ്ഞെടുപ്പ് പരാജയ കാരണം ചർച്ച ചെയ്യാൻ കെപിസിസി എക്സിക്യുട്ടീവ് ക്യാമ്പിൽ കെ.പി.സി.സി നേതൃത്വത്തിന‌െതിരെ രൂക്ഷ വിമർശനം. അധ്യക്ഷന്‍ വി.എം.സുധീരന്‍, മുന്‍ മുഖ്യമന്ത്രി ഉമ്മന്‍ ചാണ്ടി, പ്രതിപക്ഷ നേതാവ് രമേശ് ചെന്നിത്തല, മുതിര്‍ന്ന നേതാവ് എ.കെ.ആന്റണി എന്നിവര്‍ക്കെതിരേയാണ് രൂക്ഷ വിമര്‍ശനം ഉണ്ടായത്. യുഡിഎഫ് സർക്കാരിന്‍റെ മദ്യനയം പരാജയമാണെന്നും ഒരു വിഭാഗം വിമർശനം ഉന്നയിച്ചു.

സംസ്ഥാന നേതൃത്വത്തിന്റെ വീഴ്ച മൂലമാണ് തെരഞ്ഞെടുപ്പില്‍ തിരിച്ചടി ഉണ്ടായതെന്ന് പല അംഗങ്ങളും അഭിപ്രായപ്പെട്ടു.നേതൃത്വത്തിൽ വിശ്വാസമില്ലെന്നും നേതൃത്വത്തിലെല്ലാം അഴിമതിക്കാരാണെന്നും വിഡി സതീശൻ യോഗത്തിൽ ആരോപണം ഉന്നയിച്ചു. സുധീരന്‍ കെപിസിസി അധ്യക്ഷ സ്ഥാനം ഒഴിയണമെന്ന് വൈസ് പ്രസിഡന്റുമാരായ വി.ഡി.സതീശന്‍, എം.എം.ഹസന്‍ എന്നിവര്‍ ആവശ്യപ്പെട്ടു. പാർട്ടി ഭരണചനേതൃത്വത്തിന് മേൽ ജനങ്ങൾക്കുള്ള വിശ്വാസം നഷ്ടപ്പെട്ടു. ഒന്നും ചെയ്യാന്‍ കഴിവില്ലാത്ത കേന്ദ്ര നേതൃത്വമാണ് പാര്‍ട്ടിക്കുള്ളതെന്നും ആന്റണി ഇത് കണ്ടു മൗനം പാലിക്കുകയാണെന്നും വിമര്‍ശനം ഉയര്‍ന്നു. വർഗീയത ഫലപ്രദമായി പ്രതിരോധിക്കാൻ സാധിച്ചില്ല. പാർട്ടി കേന്ദ്രനേതൃത്വത്തിന് ഒരു സമരം പോലും നടത്താൻ ത്രാണിയില്ലെന്നും യോഗത്തിൽ വിമർശനം ഉയർന്നു.

തെരഞ്ഞെടുപ്പിന് സംഘടനാപരമായ മുന്നൊരുക്കം ഉണ്ടായില്ലെന്ന് വി.ഡി. സതീശന്‍ വ്യക്തമാക്കി. തോറ്റ സ്ഥാനാർഥികളുടെ വാദം കേൾക്കാനായി അവരെയും യോഗത്തിലേക്ക് ക്ഷണിച്ചിട്ടുണ്ട്. പാര്‍ട്ടിയുടെ മതേതരമുഖവും നഷ്ടമായിക്കൊണ്ടിരിക്കുന്നു. ഈ രീതിയില്‍ മുന്നോട്ടു പോകാനാകില്ലെന്ന് സതീശന്‍ പറഞ്ഞു. നെയ്യാര്‍ ഡാമിലെ രാജീവ് ഗാന്ധി ഇന്‍സ്റ്റിറ്റ്യൂട്ടിലാണ് രണ്ടു ദിവസം നീളുന്ന എക്‌സിക്യൂട്ടീവ് യോഗം നടക്കുന്നത്.