ഒടുവിൽ യുഡിഎഫ് നിലപാട് മാറ്റി? ലൈഫ് മിഷന്‍ പിരിച്ചുവിടില്ലെന്ന് മുല്ലപ്പള്ളി

കാസർകോട്: വരുന്ന നിയമസഭ തെരഞ്ഞെടുപ്പിനു ശേഷം യുഡിഎഫ് അധികാരത്തിലെത്തിയാൽ ലൈഫ് മിഷൻ പദ്ധതി പിരിച്ചുവിടില്ലെന്ന് കെപിസിസി അധ്യക്ഷൻ മുല്ലപ്പള്ളി രാമചന്ദ്രൻ. തദ്ദേശ തെരഞ്ഞെടുപ്പ് ഘട്ടത്തിൽ യുഡിഎഫ് കൺവീനർ എംഎം ഹസ്സൻ നടത്തിയ പ്രസ്താവനയെ തള്ളുന്നതാണ് മുല്ലപ്പള്ളിയുടെ പ്രതികരണം. അധികാരത്തിലെത്തിയാൽ ലൈഫ് മിഷൻ പരിച്ചുവിടുമെന്നായിരുന്നു എംഎം ഹസ്സൻ നേരത്തെ പറഞ്ഞത്.ലൈഫ് മിഷൻ പദ്ധതി പിരിച്ചുവിടില്ലെന്ന് പറഞ്ഞ മുല്ലപ്പള്ളി അഴിമതി സംബന്ധിച്ച് അന്വേഷണം നടക്കട്ടെയെന്ന് പറഞ്ഞതായി മാതൃഭൂമി ന്യൂസാണ് റിപ്പോർട്ട് ചെയ്തത്. 'ലൈഫ് മിഷനെക്കുറിച്ച് കോണ്‍ഗ്രസിന് കൃത്യമായ അഭിപ്രായമുണ്ട്. ലൈഫ് മിഷന്‍ ഒരിക്കലും പിരിച്ചുവിടില്ല. രാജ്യത്ത് പതിനായിരക്കണക്കിന് പട്ടിണിപ്പാവങ്ങളുണ്ട്. അവര്‍ക്കുള്ള ഭവനപദ്ധതി ആവിഷ്‌കരിച്ച് നടപ്പാക്കിയത് ഞങ്ങളാണ്.' മുല്ലപ്പള്ളി പറഞ്ഞു.

ബിജെപിയുമായി സഹകരിക്കും, രാഷ്ട്രീയത്തിൽ സജീവമാകുമെന്ന് മുന്‍ ഡിജിപി ജേക്കബ് തോമസ്

അധികാരത്തിലെത്തിയാൽ ലൈഫ് മിഷൻ പദ്ധതി ത്വരിതഗതിയില്‍ മുന്നോട്ടുകൊണ്ടുപോകുകയും വീടില്ലാത്ത ഒരാളും സംസ്ഥാനത്തില്ല എന്ന സ്ഥിതിയിലേയ്ക്ക് എത്തിക്കുമെന്നും മുല്ലപ്പള്ളി പറഞ്ഞു. നേരത്തെ തദ്ദേശ തെരഞ്ഞെടുപ്പ് സമയത്ത് യുഡിഎഫ് കൺവീനർ നടത്തിയ പ്രസ്താവന ഇടതുപക്ഷം രാഷ്ട്രീയ ആയുധമാക്കിയിരുന്നു.

Also Read : ഉമ്മന്‍ ചാണ്ടിക്കും മുഖ്യമന്ത്രിയാകാം, കോണ്‍ഗ്രസിലെ തെരഞ്ഞെടുപ്പ് ഇങ്ങനെ; വിശദമാക്കി കെ മുരളീധരന്‍

യുഡിഎഫ് അധികാരത്തിലെത്തിയാല്‍ ലൈഫ് മിഷന്‍ പിരിച്ചുവിടുമെന്ന ഹസ്സന്‍റെ വാക്കുകൾ തദ്ദേശ തെരഞ്ഞെടുപ്പില്‍ കോണ്‍ഗ്രസിന് തിരിച്ചടിയായെന്ന വിലയിരുത്തലിലുണ്ടായിരുന്നു. ഈ സാഹചര്യത്തിൽ കൂടിയാണ് മുല്ലപ്പള്ളി പദ്ധതി പിരിച്ചുവിടില്ലെന്ന് വ്യക്തമാക്കിയിരിക്കുന്നത്. ഇടതുപക്ഷം ഭരണനേട്ടമായി ഉയർത്തിക്കാണിച്ച പ്രധാന പദ്ധതികളിലൊന്നാണ് ലൈഫ് മിഷന്‍.