കെപിസിസി ഭാരവാഹി പട്ടിക സമർപ്പിക്കാനാകാതെ സുധാകരൻ; തർക്കം രൂക്ഷം

പട്ടിക സംബന്ധിച്ച് മുതിർന്ന നേതാക്കളുമായി ചർച്ച നടത്തിയെന്നാണ് പ്രതിപക്ഷ നേതാവ് വി ഡി സതീശൻ ഞായറാഴ്ച പറഞ്ഞത്. എന്നാൽ നേതാക്കളുമായി കൂടിയാലോചന നടന്നിട്ടില്ലെന്ന് സുധീരനും മുല്ലപ്പള്ളിയും പറഞ്ഞു. വനിതാ പ്രാതിനിധ്യം വർദ്ധിപ്പിക്കാൻ മാനദണ്ഡങ്ങളിൽ മാറ്റം വരുത്തിയെന്നാണ് വിവരം. ഇതിലും തർക്കം നിലനിൽക്കുന്നുണ്ട്. കെപിസിസി ഭാരവാഹി പട്ടിക സംബന്ധിച്ച് ഇതുവരെ പരസ്യ പ്രതികരണങ്ങൾ ഉണ്ടായിരുന്നില്ല. ഇതുവരെ പാലിച്ചിരുന്ന മൗനം ഭേദിച്ചാണ് മുതി‍ര്‍ന്ന നേതാക്കളുടെ പ്രതികരണം.

വി ടി ബൽറാം, ശബരീനാഥൻ, ശിവദാസൻ നായർ, വി എസ് ശിവകുമാർ, വി പി സജീന്ദ്രൻ എന്നിവർ കെപിസിസി ഭാരവാഹികളാകുമെന്നാണ് പുറത്തുവരുന്ന സൂചനകൾ. സംസ്ഥാന നേതൃത്വവുമായി പിണങ്ങി നിൽക്കുന്ന എ വി ഗോപിനാഥനേയും പട്ടികയിൽ ഉൾപ്പെടുത്തിയേക്കും. . എറണാകുളത്ത് നിന്നുള്ള ജമാൽ മണക്കാടൻ്റെ പേര് ട്രഷറർ സ്ഥാനത്തേക്ക് പരിഗണിക്കുന്നുണ്ടെന്നാണ് സൂചന. വനിതകളുടെ പ്രതിനിധ്യം വർധിപ്പിക്കാൻ നിലവിലെ മാനദണ്ഡങ്ങൾ വരുത്തിയതോടെ പത്‌മജ വേണുഗോപാൽ, ബിന്ദു കൃഷ്ണ എന്നിവർ ഭാരവാഹികൾ ആകാനുള്ള സാധ്യത വർധിച്ചു.