ക്ഷമയെ പരീക്ഷിക്കുന്ന തീരുമാനമെന്ന് ശബരീനാഥന്‍

കോഴിക്കോട്: കോണ്‍ഗ്രസ് എം.എല്‍.എ കെ.എസ്. ശബരിനാഥൻ ശക്തമായ പ്രതികരണവുമായി രംഗത്ത്. കോണ്‍ഗ്രസിന്‍റെ രാജ്യസഭാ സീറ്റ് കേരളാ കോണ്‍ഗ്രസ് എമ്മിന് നല്‍കിയതിനെതിരെ പ്രതിഷേധം ശക്തിപ്പെടുന്നതിനിടെയാണിത്. ജോസ് കെ. മാണിക്ക് രാജ്യസഭാ സീറ്റ് വിട്ടു കൊടുത്തത് അംഗീകരിക്കില്ലെന്ന് ശബരീനാഥന്‍ മാധ്യമങ്ങളോട് പറഞ്ഞു.

സാധാരണ പ്രവര്‍ത്തകരുടെ ക്ഷമയെ പരീക്ഷിക്കുന്ന തീരുമാനമാണിത്. പുതിയ ഒരാള്‍ക്ക് സീറ്റ് നല്‍കണം. ലോക്സഭയില്‍ യു.പി.എക്ക് ഒരംഗത്തെ കുറയുന്നത് പ്രതിപക്ഷത്തെ ബാധിക്കും. തീരുമാനം പുനഃപരിശോധിക്കുമെന്നാണ് പ്രതീക്ഷയെന്നും ശബരീനാഥന്‍ പറഞ്ഞു. കൂടാതെ ഫേസ്ബുക്ക് പോസ്റ്റിലൂടെയും ശബരീനാഥന്‍ പ്രതികരിച്ചിട്ടുണ്ട്. "പച്ചപ്പരവതാനിയുള്ള ലോകസഭയില്‍ നിന്നും ഒരല്പം നടന്ന് ചുവന്ന പരവതാനിയുള്ള രാജ്യസഭയിലേക്കു ചേക്കേറുമ്പോള്‍ കേരളത്തില്‍ മുന്നണി ശക്തിപ്പെടും, തീര്‍ച്ച." എന്നായിരുന്നു പരിഹാസ രൂപേണയുള്ള പ്രതികരണം.