കെ എം ഷാജിക്കെതിരായ വിധി ലീഗിനും യൂത്ത് ലീഗിനും പടച്ചവൻ നൽകിയ ശിക്ഷ: കെ ടി ജലീൽ

തിരുവനന്തപുരം: കെ എം ഷാജിക്കെതിരായ ഹൈക്കോടതി വിധി മുസ്ലിം ലീഗിനും യൂത്ത് ലീഗിനും പടച്ചവൻ നൽകിയ ശിക്ഷയാണെന്ന് മന്ത്രി കെ ടി ജലീൽ. അന്യായം പറഞ്ഞ് അപകീർത്തിപ്പെടുത്താൻ ശ്രമിച്ചതിനുള്ള പടച്ചവന്റെ ശിക്ഷയാണിതെന്നും മന്ത്രി കൂട്ടിച്ചേർത്തു.

ഇത് മതേതര രാഷ്ട്രീയത്തിന്റെ വിജയമാണ്. മതത്തിന്റെയും ജാതിയുടെയും അടിസ്ഥാനത്തിൽ സംഘടിക്കുകയും ആ വിചാരവും വികാരവും ആളിക്കത്തിച്ച് വോട്ട് നേടുന്ന ദുഷിച്ച സംസ്ക്കാരത്തിനെതിരായ വിധിയാണിതെന്നും മന്ത്രി പറഞ്ഞു.

എന്തൊക്കെയായിരുന്നു ഇവരൊക്കെ ഫേസ്ബുക്കിലും സോഷ്യൽ മീഡിയയിലും പ്രചരിപ്പിച്ചിരുന്നത്. ഇതൊക്കെ മുകളിൽ ഇരിക്കുന്ന ഒരാൾ കാണുന്നുണ്ടെന്നെങ്കിലും ഇവർ വിചാരിക്കേണ്ടേ. ഏതായാലും ഇതൊക്കെ ആരോപിച്ചവരെ കാത്തിരിക്കുന്നത് സമാനമായ അനുഭവമാണെന്ന് എല്ലാവരും ഓർമ്മിച്ചാൽ നന്നാകുമെന്നും കെ ടി ജലീൽ പറഞ്ഞു.

ലീഗ് നേരത്തെ വർഗീയ ചിന്തയില്ലാതെയായിരുന്നു പ്രവർത്തിച്ചത്. എന്നാൽ ഇപ്പോൾ അങ്ങനെയല്ല. ലീഗ് സ്വന്തം കാര്യം നേടാനും തെരഞ്ഞെടുപ്പിൽ വിജയിക്കാനും വർഗ്ഗീയ കാർഡ് ഉപയോഗിക്കുന്നുവെന്നത് കുറച്ചുകാലമായി ഉയരുന്ന ആരോപണമാണ്. മതവും വിശ്വാസവും പറഞ്ഞാണ് തെരഞ്ഞെടുപ്പുകളിൽ മുസ്ലിം വിഭാഗത്തെ തങ്ങളുടെ പക്കലേക്ക് കൊണ്ടുവരുന്നതെന്നും ജലീൽ ആരോപിച്ചു.

വർഗ്ഗീയ പ്രചാരണം നടത്തിയെന്ന നികേഷ് കുമാറിന്റെ ഹർജിയിലാണ് അഴീക്കോട് എംഎൽഎ കെ എം ഷാജിയെ ഹൈക്കോടതി അയോഗ്യനാക്കിയത്. ആറ് വർഷത്തേക്കാണ് അയോഗ്യത കൽപ്പിച്ചിരിക്കുന്നത്.