Minister KT Jaleel: അനധികൃതമായി ഒന്നും ചെയ്തിട്ടില്ലെന്ന് ജലീല്‍

തിരുവനന്തപുരം: സംസ്ഥാന ന്യൂനപക്ഷ ധനകാര്യ കോര്‍പ്പറേഷനിലെ നിയമനവുമായി ബന്ധപ്പെട്ട് അനധികൃതമായി താന്‍ ഒന്നും ചെയ്തിട്ടില്ലെന്ന് മന്ത്രി കെടി ജലീല്‍. ക്രമക്കേടുകള്‍ നടത്തി പിരിച്ചുവിട്ട ഉദ്യോഗസ്ഥനെ മന്ത്രി തിരിച്ചെടുത്തെന്ന കെഎം ഷാജി എംഎല്‍എയുടെ ആരോപണം കെടി ജലീല്‍ തള്ളി. അങ്ങനെയൊരു ഉദ്യോഗസ്ഥനെ താന്‍ തിരിച്ചെടുത്തിട്ടില്ലെന്ന് മന്ത്രി വ്യവ്കതമാക്കി. നിയമനവുമായി ബന്ധപ്പെട്ട വിവാദങ്ങളോട് പ്രതികരിക്കുകയായിരുന്നു അദ്ദേഹം.

പാലക്കാട് എലപ്പുള്ളി പഞ്ചായത്തില്‍ തണ്ണീര്‍ത്തട സംരക്ഷണനിയമം അട്ടിമറിച്ച ഉദ്യോഗസ്ഥനെ മന്ത്രി സംരക്ഷിക്കുന്നുവെന്നായിരുന്നു കെഎം ഷാജിയുടെ ആരോപണം. എന്നാല്‍ ആരോപണവിധേയനായ യുഡി ക്ലര്‍ക്കിനെ തനിക്കറിയില്ലെന്നും ഉദ്യോഗസ്ഥനെ തിരിച്ചെടുത്തത് സാധാരണ നടപടിക്രമം മാത്രമാണെന്നും മന്ത്രി ചൂണ്ടിക്കാട്ടി. ഉദ്യോഗസ്ഥനെ പുറത്താക്കിക്കൊണ്ടുള്ള ഉത്തരവ് സ്റ്റേ ചെയ്ത് അയാളെ തിരിച്ചെടുക്കാന്‍ ജൂണ്‍ 14ന് മന്ത്രി നിര്‍ദ്ദേശിച്ചെന്നും ഷാജി ആരോപിച്ചിരുന്നു.