കോണ്‍ഗ്രസിന്‍റെ രാഷ്ട്രീയ തന്ത്രം ഗുജറാത്തില്‍ പൊലിഞ്ഞു: കുമ്മനം

തിരുവനന്തപുരം: ജാതിരാഷ്ട്രീയവും സങ്കുചിത രാഷ്ട്രീയവും ഉപയോഗപ്പെടുത്തി തിരഞ്ഞെടുപ്പില്‍ വിജയിക്കാം എന്ന കോണ്‍ഗ്രസിന്റെ രാഷ്ട്രീയതന്ത്രമാണ് ഗുജറാത്തില്‍ പൊലിഞ്ഞു വീണതെന്ന് ബി ജെ പി സംസ്ഥാന അദ്ധ്യക്ഷന്‍ കുമ്മനം രാജശേഖരന്‍. ഗുജറാത്തിലെയും ഹിമാചല്‍ പ്രദേശിലെയും നിയമസഭാ തിരഞ്ഞെടുപ്പില്‍ ബി ജെ പി നേടിയ വിജയം ഭാരതം ഒരു കോണ്‍ഗ്രസ് വിമുക്ത രാജ്യമായി മാറാന്‍ പോകുന്നതിന്റെ സൂചനയാണ്.

അതേസമയം അഴിമതിയും സ്വജനപക്ഷപാതവും നടത്തി രാഷ്ട്രീയരംഗത്തെ ഒന്നാകെ മലിനപ്പെടുത്തിയ കോണ്‍ഗ്രസിന് ഉചിതമായ മറുപടി നല്‍കുകയാണ് ഹിമാചല്‍ പ്രദേശിലെ ജനങ്ങള്‍ ചെയ്തതെന്നും കുമ്മനം പറഞ്ഞു. വികസനരാഷ്ട്രീയവും ജാതിരാഷ്ട്രീയവും തമ്മിലുള്ള മത്സരമാണ് ഗുജറാത്തില്‍ നടന്നത്. ജനങ്ങള്‍ വികസനഭരണത്തിന്റെ തുടര്‍ച്ച തിരഞ്ഞടുത്തിരിക്കുന്നു.

2019- ല്‍ നടക്കാന്‍ പോകുന്ന പാര്‍ലമെന്റ് തിരഞ്ഞെടുപ്പില്‍ ഭാരതത്തില്‍ നടക്കാന്‍ പോകുന്ന രാഷ്ട്രീയ പരിവര്‍ത്തനം ഏതു ദിശയിലേക്കാണ് എന്നതിന്റെ വ്യക്തമായ സൂചനകളാണ് ഗുജറാത്തിലും ഹിമാചല്‍ പ്രദേശിലും നടന്ന തിരഞ്ഞെടുപ്പു ഫലങ്ങള്‍ വ്യക്തമാക്കുന്നതെന്നും കുമ്മനം കൂട്ടിച്ചേര്‍ത്തു.