കുമ്മനം രാജശേഖരന്‍ മിസോറാം ഗവര്‍ണറായി ഇന്ന് സത്യപ്രതിജ്ഞ ചെയ്യും

തിരുവനന്തപുരം: കുമ്മനം രാജശേഖരന്‍ മിസോറാം ഗവര്‍ണറായി ഇന്ന് സത്യപ്രതിജ്ഞ ചെയ്ത് അധികാരത്തിലേറും. രാവിലെ 11.30 നാണ് സത്യപ്രതിജ്ഞാ ചടങ്ങ്. പഞ്ചായത്ത് മെമ്പര്‍ പോലും ആയിട്ടില്ലാത്ത തനിക്ക് ഗവര്‍ണര്‍ പദവി ഒരു വെല്ലുവിളിയാണെന്നും സംസ്ഥാന ബിജെപി അധ്യക്ഷ പദവിയിൽ നിന്ന് മാറ്റുന്നതിലെ അതൃപ്തിയും കുമ്മനം രാജശേഖരന്‍ വ്യക്തമാക്കിയിരുന്നു. അതേസമയം തന്നെ ഗവര്‍ണറായി നിയമിച്ചതില്‍ സന്തോഷവും അഭിമാനവുമുണ്ടെന്നും കുമ്മനം പറഞ്ഞിരുന്നു.

സമരം ചെയ്യാനും അതേസമയം ഒരു ഗവര്‍ണര്‍ ആയി പ്രവര്‍ത്തിക്കാനും അറിയാം എന്ന് തെളിയിക്കേണ്ടത് ഇനി എന്‍റെ കടമയാണെന്നും താന്‍ ചെയ്ത സേവനങ്ങള്‍ കണ്ടറിഞ്ഞാകാം ഈ ഉത്തരവാദിത്വം ഏല്‍പ്പിച്ചതെന്നും വാര്‍ത്ത പുറത്തു വന്നപ്പോൾ കുമ്മനം പ്രതികരിച്ചിരുന്നു. രാഷ്ട്രീയ സാമൂഹിക സാംസ്‌കാരിക രംഗത്തെ പ്രവര്‍ത്തി പരിചയം ഇതിന് മുതല്‍കൂട്ടായെന്നും ഗവര്‍ണര്‍ പദവി ലഭിച്ചത് കൃത്യമായ സമയത്തല്ല എന്ന അഭിപ്രായം ഇല്ലെന്നും കുമ്മനം മാധ്യമങ്ങളോട് പറഞ്ഞു.