ശശീന്ദ്രന് മന്ത്രിസ്ഥാനത്ത് തിരിച്ചെത്തുന്നത് അധാര്‍മികമെന്ന് കുമ്മനം

കാസര്‍കോട്: ഫോൺ വിവാദത്തിൽ മന്ത്രിസ്ഥാനം നഷ്ടമായ എൻ സി പി നേതാവ് എ കെ ശശീന്ദ്രൻ്റെ മന്ത്രിസഭാപുനഃപ്രവേശനത്തിനുള്ള നീക്കം ധാര്‍മ്മിക രാഷ്ട്രീയത്തിനേൽക്കുന്ന തിരിച്ചടിയാണെന്ന് ബിജെപി സംസ്ഥാന അധ്യക്ഷൻ കുമ്മനം രാജശേഖരൻ. ബിജെപി വികാസ് യാത്രയുടെ ഭാഗമായി കാസര്‍കോട് എത്തിയതായിരുന്നു കുമ്മനം.

ശശീന്ദ്രൻ മന്ത്രിസ്ഥാനത്ത് തിരിച്ചെത്തുന്നത് നിയമപരമായി ശരിയല്ലെന്നും സംഭവത്തിന്‍റെ ധാര്‍മിക ഉത്തരവാദിത്തം ഏറ്റെടുത്ത് രാജിവെച്ച ശശീന്ദ്രൻ ഏതു സാഹചര്യത്തിലാണ് തിരികെ പ്രവേശിക്കാനുള്ള തീരുമാനമെടുത്തതെന്ന് വ്യക്തമാക്കണമെന്നും കുമ്മനം ആവശ്യപ്പെട്ടു.

കാസര്‍കോട് നടക്കുന്ന എൻഡോസള്‍ഫാൻ വിരുദ്ധസമരങ്ങള്‍ക്ക് കുമ്മനം പിന്തുണ പ്രഖ്യാപിച്ചു. ഇരകളുമായി ചേര്‍ന്ന് നീതിയ്ക്കുള്ള പോരാട്ടങ്ങള്‍ നടത്തുമെന്നും കുമ്മനം പറഞ്ഞു. പാവങ്ങളുടെ പടത്തലവൻ എന്നറിയപ്പെടുന്ന മുഖ്യമന്ത്രിയ്ക്ക് ജനങ്ങളുടെ ഹൃദയവികാരം കാണാനുള്ള മനുഷ്യത്വമുണ്ടാവണമെന്നും കുമ്മനം കൂട്ടിച്ചേര്‍ത്തു.