ഫാ കുര്യാക്കോസ് കാട്ടുതറയുടെ മൃതദേഹം നാട്ടിലെത്തിച്ചു; സംസ്ക്കാരം ഇന്ന്

പള്ളിപ്പുറം: ജലന്ധർ ബിഷപ്പിനെതിരെ മൊഴി നൽകിയ ഫാ കുര്യാക്കോസ് കാട്ടുതറയുടെ മൃതദേഹം ജന്മസ്ഥലമായ പള്ളിപ്പുറത്തെത്തിച്ചു. ബുധനാഴ്ച രാത്രി ഒമ്പതോടെയാണ് ഇളയ സഹോദൻ ജോർജ് കുര്യന്റെ വീട്ടിൽ വൈദികന്റെ മൃതദേഹം എത്തിച്ചത്. സംസ്ക്കാര ശുശ്രൂഷകൾ വ്യാഴാഴ്ച ഉച്ചയ്ക്ക് 12 മണിക്ക് കുടുംബവീട്ടിൽ ആരംഭിക്കും. തുടർന്ന് പള്ളിപ്പുറം സെന്റ്മേരീസ് പള്ളിയിലെ കുടുംബ കല്ലറയിൽ വൈദികന്റെ മൃതദേഹം സംസ്ക്കരിക്കും.

എറണാകുളം അങ്കമാലി രൂപതാ അഡ്മിനിസ്ട്രേറ്റർ മാർ ജേക്കബ് മനത്തേടത്താണ് സംസ്ക്കാര ശുശ്രൂഷകൾക്ക് നേതൃത്വം നൽകുന്നത്. തുടർന്ന് കാട്ടുതറ കുടുംബാംഗങ്ങളുടെ നേതൃത്വത്തിൽ പള്ളിച്ചന്തയിൽ അനുശോചന യോഗം നടക്കും.

തിങ്കളാഴ്ച രാവിലെയാണ് ഫാ കുര്യാക്കോസിന്റെ കിടപ്പുമുറിയിൽ മരിച്ചനിലയിൽ കണ്ടെത്തിയത്. ചൊവ്വാഴ്ച ജലന്ധറിൽവെച്ച് പോസ്റ്റ്മോർട്ടം നടത്തിയ ശേഷം ബുധനാഴ്ച വൈകിട്ടോടെ ഇൻഡിഗോ വിമാനത്തിലാണ് വൈദികന്റെ മൃതദേഹം നാട്ടിലെത്തിച്ചത്. വൈദികന്റെ സഹോദരങ്ങളും ഫാ ജോസ് പടയാട്ടിലും മൃതദേഹത്തെ അനുഗമിച്ചു.