ഹോട്ടലുകളില്‍ തൊഴില്‍ വകുപ്പിന്‍റെ വ്യാപക പരിശോധന

കൊച്ചി: സംസ്ഥാനത്തുടനീളമുളള ഹോട്ടലുകളില്‍ വ്യാപകമായ പരിശോധനകള്‍ക്കാണ് തൊഴില്‍ വകുപ്പ് നേതൃത്വം നല്‍കിയത്. കേരളത്തിലെ ഹോട്ടലുകളില്‍ ജോലി ചെയ്യുന്നവര്‍ക്ക് തൊഴില്‍ നിയമപ്രകാരമുളള അവകാശങ്ങള്‍ ലഭ്യമാക്കിയിട്ടുണ്ടെന്ന് ഉറപ്പുവരുത്തുന്നതിനായിരുന്നു പരിശോധന. പരിശോധനയില്‍ നിയമം പാലിക്കാത്തവര്‍ക്കെതിരെ നടപടികളാരംഭിച്ചു.

തൊഴില്‍ നിയമപ്രകാരം ലഭിക്കേണ്ട അവകാശങ്ങള്‍ ലഭിക്കുന്നുണ്ട് എന്ന് ഉറപ്പുവരുത്തുവാന്‍ ലേബര്‍ കമ്മീഷണര്‍ . സി.വി.സജന്‍ ഐ.എ.എസിന് ബഹു. രൊഴില്‍ വകുപ്പ് മന്ത്രി നിര്‍ദ്ദേശം നല്‍കിയിരുന്നു. റീജിയണല്‍ ജോയിന്റ് ലേബര്‍ കമ്മീഷണര്‍മാരുടെ മേല്‍നോട്ടത്തില്‍ ജില്ലാ ലേബര്‍ ഓഫീസര്‍മാരുടേയും അസിസ്റ്റന്റ് ലേബര്‍ ഓഫീസര്‍മാരുടേയും നേതൃത്വത്തിലായിരുന്നു പരിശോധന.

നിയമലംഘനങ്ങള്‍ കണ്ടെത്തിയ എല്ലാ സ്ഥാപനങ്ങള്‍ക്കുമെതിരെ നിയമനടപടികള്‍ ആരംഭിച്ചു. എറണാകുളം റീജിയണല്‍ ജോയിന്റ് ലേബര്‍ കമ്മീഷണര്‍ കെ. ശ്രീലാല്‍ എറണാകുളത്തു നടത്തിയ പരിശോധനയ്ക്ക് നേതൃത്വം നല്‍കി. 40 സ്ഥാപനങ്ങളില്‍ പരിശോധന നടത്തുകയും നിയമലംഘനങ്ങള്‍ കണ്ടെത്തിയ 40 സ്ഥാപനങ്ങള്‍ക്കെതിരെ പരിശോധന ഉത്തരവ് നല്‍കുകയും ചെയ്തു.

നിയമലംഘനങ്ങള്‍ പരിഹരിക്കാത്ത പക്ഷം പ്രോസിക്യൂഷന്‍ ഉള്‍പ്പെടെയുളള നടപടികള്‍ സ്വീകരിക്കുമെന്ന് ശ്രീ.കെ. ശ്രീലാല്‍ അറിയിച്ചു. അസിസ്റ്റന്റ് ലേബര്‍ ഓഫീസര്‍ ഗ്രേഡ്-1, അസിസ്റ്റന്റ് ലേബര്‍ ഓഫീസര്‍മാര്‍ എന്നിവര്‍ പരിശോധനയില്‍ പങ്കെടുത്തു.