ബാലഭാസ്കറിന്‍റെ ഭാര്യയുടെ ആരോഗ്യനില മെച്ചപ്പെട്ടു

തിരുവനന്തപുരം: വാഹനാപകടത്തില്‍ ഗുരുതരമായി പരിക്കേറ്റ് ചികിത്സയില്‍ കഴിയുന്ന ലക്ഷ്മിയുടെ ആരോഗ്യനില മെച്ചപ്പെട്ടതായി ഡോക്ടര്‍മാര്‍ അറിയിച്ചു. ഇപ്പോഴും തീവ്ര പരിചരണ വിഭാഗത്തില്‍ തന്നെയാണെങ്കിലും വെന്‍റിലേറ്ററിന്‍റെ സഹായം എണ്‍പത് ശതമാനമായി കുറച്ചു. അതേസമയം അപകടത്തില്‍ പരിക്കേറ്റ ഇവരുടെ ഡ്രൈവര്‍ അര്‍ജുനനെ വാര്‍ഡിലേക്ക് മാറ്റി.

ലക്ഷ്മിയുടെ കാല്‍മുട്ടിനും തലച്ചോറിനും തോളിലെ ഞരമ്പിനുമാണ് സാരമായി പരിക്കേറ്റത്. ഇതില്‍ കാല്‍മുട്ടിനും തലച്ചോറിനും ഏറ്റ പരിക്കുകള്‍ ഭേദപ്പെട്ടുവരികയാണ്. ഇടയ്ക്ക് ബാലുവിനെയും മകളെയും തിരക്കാറുണ്ട്. ഇവര്‍ ചികിത്സയിലാണെന്നാണ് ബന്ധുക്കള്‍ ലക്ഷ്മിയോട് പറഞ്ഞിരിക്കുന്നത്. മാനസീകാഘാതമുണ്ടാക്കുന്ന കാര്യങ്ങള്‍ ലക്ഷ്മിയോട് പറയരുതെന്ന ഡോക്ടര്‍മാരുടെ നിര്‍ദ്ദേശത്തെ തുടര്‍ന്ന് ഇവരുടെ മരണവിവരം ലക്ഷമിയെ അറിയിച്ചിട്ടില്ല.