Sabarimala Protest: പ്രതിഷേധം ആര്‍എസ്എസിന്‍റെ അജണ്ട; സര്‍ക്കാര്‍ വിശ്വാസികള്‍ക്കൊപ്പമെന്ന് മുഖ്യമന്ത്രി

കോഴിക്കോട്: ശബരിമലയിലെ പ്രതിഷേധം ആര്‍എസ്എസിന്‍റെ വ്യക്തമായ അജണ്ടയെന്ന് മുഖ്യമന്ത്രി പിണറായി വിജയന്‍. ശബരിമലയില്‍ സംഘര്‍ഷം സൃഷ്ടിക്കാന്‍ മനപൂര്‍വ്വം ആളുകളെത്തുകയാണ്. ഇവരുടെ പശ്ചാത്തലവും പുറത്തുവരുന്നുണ്ടെന്ന് മുഖ്യമന്ത്രി ചൂണ്ടിക്കാട്ടി. കോഴിക്കോട് നടന്ന കേരള പത്ര പ്രവര്‍ത്തക യൂണിയന്‍റെ സംസ്ഥാന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു മുഖ്യമന്ത്രി.

സര്‍ക്കാര്‍ വിശ്വാസികള്‍ക്കൊപ്പമാണ്. ശബരിമലയിലെ പ്രശ്നങ്ങളില്‍ സര്‍ക്കാരിന് പിടിവാശിയോ ആശയക്കുഴപ്പമോ ഇല്ല. കേരളത്തെ ഇരുണ്ട കാലത്തേക്ക് കൊണ്ടുപോകാനാണ് പ്രതിഷേധം സംഘടിപ്പിക്കുന്നവരുടെ ശ്രമമെന്നും ആചാരം മാറിയാല്‍ എന്തോ സംഭവിക്കുമെന്ന് ചിലര്‍ കരുതുന്നതെന്നും മുഖ്യമന്ത്രി പറഞ്ഞു.

സുപ്രീംകോടതിയുടെ വിധി നടപ്പാക്കുക എന്ന സര്‍ക്കാരിന്‍റെ കടമയാണ്. അതിനോട് ഒപ്പം നില്‍ക്കാതെ സര്‍ക്കാരിന് ഒന്നും ചെയ്യാന്‍ സാധിക്കില്ല. പ്രശ്നങ്ങളുണ്ടാക്കാന്‍ വരുമ്പോള്‍ അതിനു കൂട്ടുനില്‍ക്കാന്‍ ആകുമോയെന്നും മുഖ്യമന്ത്രി ചോദിച്ചു.