ബിഷപ്പ് നേരത്തെ രാജി വെക്കേണ്ടിയിരുന്നെന്ന് ലത്തീൻ സഭ

കൊച്ചി: കന്യാസ്ത്രീ നൽകിയ പരാതിയിൽ ബിഷപ്പ് ഫ്രാങ്കോ മുളക്കലിനെ തള്ളി ലത്തീൻ സഭ. ബിഷപ്പ് നേരത്തെ തന്നെ രാജിവെക്കേണ്ടതായിരുന്നെന്ന് കേരള റീജിയണൽ ലത്തീൻ കാത്തലിക് കൗൺസിൽ ആവശ്യപ്പെട്ടു. താനാണ് സഭ എന്ന ബിഷപ്പിന്റെ നിലപാട് ശരിയല്ല. വ്യക്തിപരമായി ബിഷപ്പിനെതിരെ ഉയർന്ന ആരോപണങ്ങൾ സഭക്കെതിരെയുള്ള ആരോപണങ്ങൾ ആണെന്ന് വ്യാഖ്യാനിക്കുന്നത് ശരിയല്ല. സഭക്ക് കളങ്കമുണ്ടാക്കുന്ന നടപടിയാണ് ബിഷപ്പ് സ്വീകരിച്ചിരിക്കുന്നതെന്ന് സഭാ വക്താവ് ഷാജി ജോർജ് പുറത്തിറക്കിയ പ്രസ്‌താവനയിൽ പറയുന്നു.

ബിഷപ്പെന്ന നിലയിൽ ഉയർത്തിപ്പിടിക്കേണ്ട ധാർമിക ബോധവും നീതി ബോധവും വിശ്വാസ്യതയും ഫ്രാങ്കോയുടെ പ്രവർത്തിയിലൂടെ ചോദ്യം ചെയ്യപ്പെട്ടിരിക്കുന്നു. ഇത്തരം ആരോപണങ്ങളിൽ ഉന്നതസ്ഥാനീയരിൽ നിന്നും ധാർമികതയാണ് വിശ്വാസികൾ പ്രതീക്ഷിക്കുന്നതെന്നും ലത്തീൻ സഭ വ്യക്തമാക്കുന്നു. എന്നാൽ, താൻ നേരത്തെ രാജി വെക്കാൻ അലോചിച്ചിരുന്നുവെന്ന് ഫ്രാങ്കോ മുളക്കൽ നേരത്തെ വെളിപ്പെടുത്തിയിരുന്നു.സഹവൈദികർ തന്നെ പിന്തിരിപ്പിച്ചുവെന്നും ബിഷപ്പ് വ്യക്തമാക്കി.