ബസ് ചാര്‍ജ് കൂടും

തിരുവനന്തപുരം ---- ബസ് ചാര്‍ജ് ഒരു രൂപ വര്‍ധിപ്പിക്കാന്‍ ഇടതു മുന്നണിയുടെ ശുപാര്‍ശ. മിനിമം ചാര്‍ജ് 7 രൂപയില്‍ നിന്ന് എട്ടാകും. ഫാസ്റ്റ് പാസഞ്ചര്‍ ബസുകളുടെ ടിക്കറ്റ് നിരക്ക് 10 രൂപയില്‍ നിന്ന് 11 ആകും.

അടുത്ത മന്ത്രിസഭയോഗത്തില്‍ ഇത് സംബന്ധിച്ച് തീരുമാനമുണ്ടാകും എന്നാണ് അറിയുന്നത്.

രാജ്യത്തെ ഡീസല്‍ വില അനുദിനം വര്‍ധിക്കുകയാണ്. ഇതില്‍ പ്രതിഷേധിച്ച് ബസ് ചാര്‍ജ് വര്‍ധന വേണമെന്ന് ബസ് ഉടമകളുടെ സംഘടന ആവശ്യപ്പെട്ടിരുന്നു. സൂചന പണിമുടക്ക് നടത്താനുള്ള നീക്കം സര്‍ക്കാരിന്‍റെ ഇടപെടലിനെ തുടര്‍ന്നാണ് മാറ്റിയത്. പിണറായി സര്‍ക്കാരില്‍ നിന്ന് അനുകൂലമായ തീരുമാനമുണ്ടാകുമെന്ന് സൂചന ലഭിച്ചതിനെത്തുടര്‍ന്നാണ് അനിശ്ചിതകാല പണിമുടക്കും ബസ് ഉടമകള്‍ വേണ്ടെന്നുവച്ചത്.

ഡീസല്‍ വിലനിയന്ത്രണം കേന്ദ്രസര്‍ക്കാര്‍ എണ്ണക്കമ്പനികളെ ഏല്‍പ്പിച്ചിരിക്കുകയാണ്. അന്താരാഷ്ട്ര വിപണിയിലെ വിലയനുസരിച്ച് എണ്ണവിലയില്‍ മാറ്റം വരുത്താനുള്ള അവകാശം കമ്പനികള്‍ക്കുണ്ട്. യുപിഎ സര്‍ക്കാര്‍ തുടങ്ങിവച്ച നയം ബിജെപിയും തുടരുകയാണ്.