സീറ്റുവിഭജനം: എൽഡിഎഫിൽ ഇന്ന് അന്തിമ ചർച്ച

തിരുവനന്തപുരം: എൽഡിഎഫിലെ സീറ്റ് വിഭജനച്ചർച്ചകൾ ഇന്ന് പൂർത്തിയായേക്കും. ഇന്ന് ഉച്ചക്ക് രണ്ടിനു നടക്കുന്ന ഇടതമുന്നണി യോഗത്തിന് മുൻപ് സീറ്റുകളുടെ കാര്യത്തിൽ ഘടകകക്ഷികളുമായി ആലോചിച്ച് അനിതമ തീരുമാനം ഉണ്ടാക്കും. ജനാധിപത്യ കേരള കോൺഗ്രസ്, ജനതാദൾ (എസ്), കോൺഗ്രസ് (എസ്) നേതാക്കളുമായുള്ള അന്തിമവട്ട ചർച്ച ഇന്നു രാവിലെ നടക്കും.

ജനാധിപത്യകേരള കോൺഗ്രസിനു നൽകാനുള്ള സീറ്റുകൾ ഇനിയും സിപിഎം കണ്ടെത്തിയിട്ടില്ല. പൂഞ്ഞാർ സീറ്റിൽ പി സി ജോർജിനെ മത്സരിപ്പിക്കണോ എന്ന കാര്യത്തിലും തീരുമാനമായിട്ടില്ല. സിപിഎം അരവിന്ദാക്ഷൻ വിഭാഗത്തിന്‍റെ കാര്യത്തിലും ഇന്ന് തീരുമാനമുണ്ടായേക്കും.

സിപിഐ കഴിഞ്ഞ തവണത്തേത് പേലെ 27 സീറ്റുകളിൽ മത്സരിക്കും. സിപിഐ നേരത്തെ മൂന്ന് സീറ്റുകൾ അധികം ചോദിച്ചിരുന്നുവെങ്കിലും പിന്നീട് ഒത്തുതീർപ്പിന് വഴങ്ങുകയായിരുന്നു. അതേസമയം മറ്റ് ഘടകക്ഷികളുമായുള്ള ചർച്ചയ്ക്ക് ശേഷം അധിക സീറ്റിന്‍റെ കാര്യത്തിൽ തീരുമാനമെടുക്കുമെന്ന് സിപിഐ നേതാക്കളായ കാനം രാജേന്ദ്രനും പന്ന്യൻ രവീന്ദ്രനും അറിയിച്ചിരുന്നു.