വരാപ്പുഴ കസ്റ്റഡി മരണം: എ വി ജോര്‍ജിനെ പ്രതി ചേര്‍ക്കില്ല

വരാപ്പുഴ: പോലീസ് കസ്റ്റഡിയിൽ വരാപ്പുഴ സ്വദേശി ശ്രീജിത്ത് കൊല്ലപ്പെട്ട കേസിൽ ആലുവ മുൻ റൂറൽ എസ് പിയെ സംരക്ഷിക്കാൻ നീക്കം. ജോര്‍ജിനെ കേസിൽ പ്രതി ചേര്‍ക്കേണ്ടെന്നാണ് ഡയറക്ടര്‍ ജനറൽ ഓഫ് പ്രോസിക്യൂഷന്‍റെ നിയമോപദേശം.

എ വി ജോര്‍ജ് ക്രിമിനൽ കുറ്റകൃത്യം നടത്തിയതിന് തെളിവില്ലെന്ന് ഡയറക്ടര്‍ ജനറൽ ഓഫ് പ്രോസിക്യൂഷൻ നിയമോപദേശം നൽകി. ശ്രീജിത്തിനെ ആളുമാറി കസ്റ്റഡിയിലെടുത്തതിന്‍റെയും മര്‍ദിച്ചതിന്‍റെയും പൂര്‍ണ ഉത്തരവാദിത്തം റൂറൽ ടൈഗര്‍ ഫോഴ്സ് ഉദ്യോഗസ്ഥരുടെ തലയിൽ കെട്ടിവെക്കുന്നതാണ് പുതിയ നീക്കം. എന്നാൽ സംഭവത്തിൽ ആര്‍ടിഎഫ് തലവനും ആര്‍ടിഎഫ് തലവനുമായ എ വി ജോര്‍ജിനെതിരെ ആദ്യഘട്ടത്തിൽ തന്നെ ആരോപണം ഉയര്‍ന്നിരുന്നു. സംഭവത്തിൽ ഇയാള്‍ക്കെതിരെ നടപടിയുടെ ഭാഗമായി റൂറൽ എസ്‍‍പി സ്ഥാനത്തുനിന്നും മാറ്റിയിരുന്നു.

എ വി ജോര്‍ജിന്‍റെ നിര്‍ദേശമനുസരിച്ചാണ് തങ്ങള്‍ ശ്രീജിത്തിനെ കസ്റ്റഡിയിലെടുത്തതെന്ന ആര്‍ടിഎഫ് ഉദ്യോഗസ്ഥരുടെ മൊഴി നിലനിൽക്കുമ്പോഴാണ് പുതിയ നിയമോപദേശം. കൂടാതെ ആളുമാറിയല്ല ശ്രീജിത്തിനെ കസ്റ്റഡിയിലെടുത്തതെന്ന് തെളിയിക്കാൻ എ വി ജോര്‍ജ് വ്യാജരേഖ ചമച്ചതായും ആരോപണമുയര്‍ന്നിരുന്നു.

അതേസമയം, പുതിയ നീക്കം അംഗീകരിക്കില്ലെന്നും എ വി ജോര്‍ജിനുമേൽ കൊലക്കുറ്റം ചുമത്തണമെന്നും ശ്രീജിത്തിന്‍റെ കുടുംബം ആവശ്യപ്പെട്ടു.