കേരളത്തിലെ പെട്രോൾ പമ്പുകളിൽ തട്ടിപ്പ്; നടപടിയുമായി ലീഗൽ മെട്രോളജി വകുപ്പ്

കൊച്ചി: മധ്യകേരളത്തിലെ പെട്രോൾ പമ്പുകളിൽ വൻ തട്ടിപ്പ് നടക്കുന്നതായി ലീഗൽ മെട്രോളജി വകുപ്പിന്‍റെ കണ്ടെത്തൽ. പരിശോധന നടത്തിയ ചില പമ്പുകളിൽ 10 ലിറ്റര്‍ പെട്രോൾ നിറയ്ക്കുമ്പോൾ 140 മില്ലി വരെ കുറവുണ്ടാകുന്നതായി കണ്ടെത്തി. ചില പമ്പുകളിൽ ലൂബ്രിക്കൻ്റിന് പരമാവധി വിപണിവിലയെക്കാള്‍ അധികം ഈടാക്കുന്നതായും കണ്ടെത്തി. കൃത്രിമം കാണിച്ച പമ്പുകള്‍ക്കെതിരെ ലീഗൽ മെട്രോളജി വകുപ്പ് കേസെടുത്തു.

പമ്പുകളിൽ പത്തുലിറ്റര്‍ പെട്രോൾ നിറയ്ക്കുമ്പോൾ അളവിൽ 80 മുതൽ 140 മില്ലിലിറ്റര്‍ വരെയാണ് കുറവ് രേഖപ്പെടുത്തിയത്. എറണാകുളം, തൃശൂര്‍, ഇടുക്കി, പാലക്കാട് ജില്ലകളിലായിരുന്നു പരിശോധന. അഞ്ചുപമ്പുകള്‍ക്കെതിരെയാണ് നടപടിയെടുത്തിരിക്കുന്നത്. ലീഗൽ മെട്രോളജി വിഭാഗം മധ്യമേഖല ഡപ്യൂട്ടി കൺട്രോളര്‍ ആര്‍ റാം മോഹൻ്റെ നിര്‍ദേശപ്രകാരമായിരുന്നു നടപടി. പൂട്ടി സീൽ വെച്ച നോസിലുകള്‍ ഇനി അളവ് കൃത്യമാക്കി സര്‍ട്ടിഫിക്കറ്റ് ഹാജരാക്കിയാൽ മാത്രമേ പ്രവര്‍ത്തിപ്പിക്കാൻ അനുവദിക്കൂ.

പല പമ്പുകളിലും 263 രൂപ പരമാവധി വിപണിവിലയുള്ള ലൂബ്രിക്കൻ്റ് ഓയിലുകൾക്ക് 290 രൂപ വരെയാണു ഈടാക്കിയിരുന്നത്. രാത്രികാലങ്ങളിൽ പമ്പുകൾ അളവിൽ കൃത്രിമം നടത്തുന്നുവെന്ന പരാതികളുടെ അടിസ്ഥാനത്തിലായിരുന്നു പരിശോധന.

ഒരേസമയം നാലു ജില്ലകളിൽ അഞ്ചു സ്ക്വാഡുകളായി തിരിഞ്ഞായിരുന്നു പരിശോധന നടത്തിയത്. രാത്രി ഒൻപതോടെ ആരംഭിച്ച പരിശോധന പുലർച്ചെ അഞ്ചുമണി വരെ നീണ്ടു.