എലിപ്പനി ബാധിച്ച് ഇന്ന് ഒൻപത് മരണം: 70 പേർക്ക് രോഗം സ്ഥിരീകരിച്ചു

തിരുവനന്തപുരം: ഇന്ന് എലിപ്പനി ബാധിച്ച് സംസ്ഥാനത്ത് ഒൻപത് പേർ മരിച്ചു.സംസ്ഥാനത്തൊട്ടാകെ എലിപ്പനി ഭീതി പടരുകയാണ്. കോഴിക്കോട് ജില്ലയിലാണ് മൂന്ന് പേർ മരിച്ചത്. ഒരാൾ രോഗലക്ഷണങ്ങളോടെയും രണ്ടു പേർ പനിബാധിച്ചുമാണ് മരിച്ചത്. കോട്ടയം മെഡിക്കൽ കോളജിൽ ഇന്ന് രണ്ടു പേർ എലിപ്പനി ബാധിച്ച് മരിച്ചതായി റിപ്പോര്ട്ടറ് ചെയ്തു. സംസ്ഥാനത്തൊട്ടാകെ ഇന്ന് 70 പേർക്ക് രോഗം സ്ഥിരീകരിച്ചു.

ഇപ്പോൾ 196 പേർ എലിപ്പനിക്ക് ചികിത്സയിലാണ്. കോഴിക്കോട്, മലപ്പുറം ജില്ലകളിലാണ് എലിപ്പനി ഏറ്റവും കൂടുതൽ പടർന്നു പിടിക്കുന്നത്. എലിപ്പനി പടരുന്ന സാഹചര്യത്തിൽ അടുത്ത മൂന്നാഴ്‌ചത്തേക്ക് കനത്ത ജാഗ്രത പാലിക്കണമെന്ന് ആരോഗ്യവകുപ്പ് നിർദേശം നൽകി. പ്രളയദുരന്ത സമയത്ത് വെള്ളത്തിലിറങ്ങിയവരെല്ലാം പ്രതിരോധ ഗുളികകൾ നിർബന്ധമായും കഴിക്കണമെന്ന് ആരോഗ്യ വകുപ്പ് നിർദേശം നൽകി.

അലോപ്പതി ചികിത്സയാണ് എലിപ്പനിക്ക് ആരോഗ്യ വകുപ്പ് നിർദേശിക്കുന്നത്. സംസ്ഥാനത്ത് ആരോഗ്യസേന വിന്യസിക്കാനും താലൂക്ക് ആശുപത്രികളെ ചികിത്സ നടത്താൻ സജ്ജമാക്കാനും ആരോഗ്യമന്ത്രി കെ.കെ. ശൈലജയുടെ നേതൃത്വത്തിൽ കോഴിക്കോട് ചേർന്ന യോഗത്തിൽ തീരുമാനിച്ചു. എലിപ്പനി രോഗ ലക്ഷണത്തോടെ വരുന്ന ആരെയും ചികിത്സ ഉറപ്പാക്കാതെ തിരിച്ചയക്കരുതെന്നും ആരോഗ്യ വകുപ്പ് നിർദേശിച്ചു.