ആത്മഹത്യ ചെയ്യാൻ കടലിൽ ചാടിയ പെൺകുട്ടിയെ രക്ഷിച്ച ലൈഫ് ഗാർഡിനെ കാണാതായി

തിരുവനന്തപുരം: ആത്മഹത്യ ചെയ്യാൻ കടലിൽ ചാടിയ പെൺകുട്ടിയെ രക്ഷിക്കാൻ ശ്രമിച്ച ലൈഫ് ഗാർഡിനെ കാണാതായി. ശംഖുമുഖത്താണ് ചെറിയതുറ സ്വദേശി ജോൺസൺ ഗബ്രിയേലിനെ കടലിൽ ചാടിയ ശേഷം കാണാതായത്. ആത്മഹത്യ ചെയ്യാൻ ശ്രമിച്ച പെൺകുട്ടിയെ കരയിലെത്തിച്ചെങ്കിലും ജോൺസണെ കാണാതായി.

ജോൺസണ് വേണ്ടി കടലിൽ തെരച്ചിൽ ഊർജ്ജിതമാക്കണമെന്ന് ആവശ്യപ്പെട്ട് ബന്ധുക്കൾ പ്രതിഷേധം ആരംഭിച്ചു. പെൺകുട്ടിയെ കരയിൽ എത്തിച്ച ശേഷം വലിയ തിരയിൽ അകപെട്ടന് ജോൺസണെ കാണാതായത്. തലയിൽ ആഘാതമേറ്റതിനാണ് ജോൺസണ് ബോധം നഷ്ടപ്പെട്ടിരിക്കാൻ സാധ്യതയുണ്ടെന്നും പ്രദേശവാസികൾ പറയുന്നു. ജോൺസണെ കണ്ടെത്താനായി രക്ഷാപ്രവർത്തകരെയും കൂടുതൽ സംവിധാനങ്ങളെയും എത്തിക്കണമെന്നാണ് നാട്ടുകാരുടെ ആവശ്യം. കടൽക്ഷോഭത്തെ തുടർന്ന് ജൂൺ 20 മുതൽ ശംഖുമുഖത്ത് സന്ദർശകർക്ക് വിലക്കേർപ്പെടുത്തിയിരുന്നു.

കനത്തമഴയെയും രൂക്ഷമായ കടൽക്ഷോഭത്തെയും തുടർന്ന് ശംഖുമുഖത്ത് തീരശോഷണം ഉണ്ടായിട്ടുണ്ട്. ഈ പ്രദേശത്ത് അപകടസാധ്യത കൂടുതലാണെന്നും ഇവിടെ സന്ദർശകർക്ക് വിലക്കുണ്ടെന്നും പ്രദേശവാസികൾ വ്യക്തമാക്കി. കൽക്കെട്ടുകളുടെ ഭാഗത്ത് പ്രത്യേക സുരക്ഷാ വലയവും നിർമിച്ചിരുന്നു. ജോൺസണായി തെരച്ചിൽ ശക്തമാക്കിയെന്ന് പോലീസ് അറിയിച്ചു.