തൃശ്ശൂർ റെയിൽവേ സ്റ്റേഷനിൽനിന്നും മോഷണം പോയ യുവാവിന്റെ സർട്ടിഫിക്കറ്റുകൾ അടങ്ങിയ ഫയൽ തിരികെ കിട്ടി. ഗൂഢല്ലൂർ സ്വദേശി വിഷ്ണുപ്രസാദിന്റെ കൈയ്യിൽനിന്നാണ് ഒറിജിനൽ സർട്ടിഫിക്കറ്റുകൾ അടങ്ങിയ ബാഗ് മോഷണം പോയത്. ഏഴ് വർഷത്തെ ഹോട്ടൽ ജോലിക്കു ശേഷം ജർമ്മൻ കപ്പലിൽ ജോലി ലഭിച്ചിരിക്കെയാണ് വിഷ്ണുവിന്റെ സർട്ടിഫിക്കറ്റുകൾ മോഷണം പോയത്. വടക്കുംനാഥ ക്ഷേത്രത്തിനു സമീപത്തുനിന്നാണ് ബാഗ് തിരികെ ലഭിച്ചത്.
ജർമ്മൻ കപ്പലിൽ ജോലി കിട്ടിയപ്പോൾ സർട്ടിഫിക്കറ്റ് ഹാജരാക്കാൻ പോകുന്നതിനിടെയാണ് വിഷ്ണുവിന്റെ സർട്ടിഫിക്കറ്റ് അടങ്ങിയ ബാഗ് കള്ളൻ തട്ടിയെടുത്തത്. തന്റെ ബാഗും വസ്ത്രങ്ങളും കൊണ്ടുപോയാലും സർട്ടിഫിക്കറ്റുകൾ തിരികെ നൽകണമെന്ന് വിഷ്ണു കരഞ്ഞ് അപേക്ഷിക്കുന്ന വീഡിയോ സമൂഹമാധ്യമങ്ങളിൽ വൈറലായിരുന്നു. നിരവധിപ്പേർ വിഷ്ണുവിന്റെ ബാഗ് തിരികെ കിട്ടുന്നതിനായി പ്രചാരണം നടത്തി. വാർത്താ മാധ്യമങ്ങളും വിഷയം ഏറ്റെടുത്തു.
പ്രതിമാസം 85,000 രൂപ ശമ്പളം ലഭിക്കുന്ന ജോലിയാണ് വിഷ്ണുവിന് ലഭിച്ചത്. ഒറിജിനൽ സർട്ടിഫിക്കറ്റുകൾ ഹാജരാക്കിയാൽ മാത്രമേ നിയമന ഉത്തരവ് ലഭിക്കുമായിരുന്നുള്ളൂ. പാസ്പോർട്ട്, കപ്പലിൽ യാത്രചെയ്യാനുള്ള അനുമതി പത്രം എന്നിവയും ബാഗിൽ ഉണ്ടായിരുന്നു. ഇതിനിടെയാണ് വിഷ്ണുവിന്റെ ബാഗ് തിരികെ ലഭിച്ചിരിക്കുന്നത്.