ഇസിജിയിൽ വ്യതിയാനം; ശിവശങ്കർ ആശുപത്രിയിൽ തുടരും, മെഡിക്കൽ ബുള്ളറ്റിൻ പുറത്തിറക്കും

തിരുവനന്തപുരം: ദേഹാസ്വാസ്ഥ്യത്തെ തുടര്‍ന്ന് തിരുവനന്തപുരത്തെ ഒരു സ്വകാര്യ ആശുപത്രിയിൽ പ്രവേശിപ്പിച്ച മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം ശിവശങ്കർ ഐഎഎസിന് ഇന്ന് ആൻജിയോഗ്രാം നടത്തും. ഇസിജിയിൽ വ്യത്യാസമുള്ളതിനാലാണ് ആൻജിയോഗ്രാം നടത്താൻ നടത്താൻ നിർദേശിച്ചതെന്ന് ആശുപത്രി അധികൃതർ കസ്‌റ്റംസിനെ അറിയിച്ചതായി ഏഷ്യാനെറ്റ് ന്യൂസ് റിപ്പോർട്ട് ചെയ്യുന്നു.

Also Read: ദേഹാസ്വാസ്ഥ്യം: എം ശിവശങ്കർ ഐഎഎസ് ആശുപത്രിയിൽ

കാർഡിയാക് ഐസിയുവിൽ കഴിയുന്ന ശിവശങ്കറിൻ്റെ ആരോഗ്യനിലയിൽ ആശങ്കപ്പെടേണ്ട സാഹചര്യമില്ലെന്ന് ഡോക്‌ടർമാർ വ്യക്തമാക്കി. ആൻജിയോഗ്രാമിന് വിധേയമാക്കിയ ശേഷം അദ്ദേഹം എത്ര ദിവസം ആശുപത്രിയിൽ തുടരുമെന്ന് വ്യക്തമല്ല. അതേസമയം, ശിവശങ്കറിൻ്റെ ആരോഗ്യനില സംബന്ധിച്ചുള്ള വിവരങ്ങൾ വ്യക്തമാക്കി വിശദമായ മെഡിക്കൽ ബുള്ളറ്റിൻ ആശുപത്രി അധികൃതർ ഇന്ന് പുറത്തിറക്കും.

തിരുവനന്തപുരം സ്വര്‍ണക്കടത്ത് കേസിൽ ചോദ്യം ചെയ്യൽ നടപടികൾക്കായി ഇന്നലെ
കസ്‌റ്റംസ് വാഹനത്തിൽ പോകുന്നതിനിടെയാണ് ശിവശങ്കറിന് ദേഹാസ്വാസ്ഥ്യം അനുഭവപ്പെട്ടത്. സ്വർണക്കടത്ത് കേസ് പിടികൂടിയ അസി. കമ്മിഷണർ രാമമൂർത്തി ഉൾപ്പെടെ പ്രിവന്റീവ് വിഭാഗത്തിലെ ഉദ്യോഗസ്ഥർ ആശുപത്രിയിൽ എത്തി വിവരങ്ങൾ ശേഖരിച്ചു. മൂന്ന് മണിക്കൂറോളം ആശുപത്രിയിൽ തങ്ങിയ ശേഷം കസ്‌റ്റംസ് അധികൃതർ ആശുപത്രിയിൽ നിന്ന് മടങ്ങിയത്.

Also Read: ബഹിഷ്കരണം പിൻവലിച്ചു; ഏഷ്യാനെറ്റ് ന്യൂസ് ചർച്ചയിൽ സഹകരിക്കുമെന്ന് സിപിഎം

നിർണായക വിവരങ്ങൾ ലഭ്യമായെന്നും അതിനാൽ ശിവശങ്കറിനെതിരെ അറസ്‌റ്റ് ഉൾപ്പെടെയുള്ള നടപടികൾക്ക് സാധ്യയുണ്ടായിരുന്നുവെന്ന റിപ്പോർട്ടുകൾ പുറത്തുവരുന്നുണ്ട്. ശനി, ഞായർ ദിവസങ്ങൾ അവധിയായതിനാൽ വെള്ളിയാഴ്‌ച തന്നെ അറസ്‌റ്റ് നടപടിയിലേക്ക് കസ്‌റ്റംസ് നീങ്ങുന്നുവെന്നായിരുന്നു റിപ്പോർട്ടുകൾ. എന്നാൽ ഇക്കാര്യത്തിൽ ഒഔദ്യോഗിക സ്ഥിരീകരണം ഉണ്ടായിട്ടില്ല. 23 വരെ ഇയാളെ അറസ്റ്റ് ചെയ്യരുത് എന്ന് കോടതി ഉത്തരവിട്ടിട്ടുണ്ട്. വ്യാഴാഴ്ച ശിവശങ്കറിനെ മൂന്നാം വട്ടം എൻഫോഴ്സ്മെന്റ് ഡയറക്ടറേറ്റ് മൂന്നാം വട്ടവും ചോദ്യം ചെയ്തിരുന്നു. ശിവശങ്കറിനെ പ്രവേശിപ്പിച്ചിരിക്കുന്ന ആശുപത്രിയിൽ പോലീസ് സാന്നിധ്യമുണ്ട്.