ടോള്‍ പ്ലാസയില്‍ പ്രത്യേക 'VIP വഴി' വേണം: മദ്രാസ് ഹൈക്കോടതി

ചെന്നൈ: വിഐപികള്‍ക്ക് ടോള്‍ പ്ലാസയില്‍ പ്രത്യേക വഴിയൊരുക്കണമെന്ന് ദേശീയ പാത അതോറിറ്റിക്ക് മദ്രാസ് ഹൈക്കോടതിയുടെ 'വിചിത്ര' നിര്‍ദേശം. സിറ്റിങ് ജഡ്‍ജിമാര്‍ ഉള്‍പ്പെടെയുള്ള വ്യക്തികളും നിര്‍ദേശത്തിന്‍റെ പരിധിയില്‍വരും. ഇത് നടപ്പാക്കാത്ത പക്ഷം കോടതിയലക്ഷ്യ നടപടി നേരിടേണ്ടിവരുമെന്നും മദ്രാസ് ഹൈക്കോടതി വ്യക്തമാക്കി.

വിഐപിമാരും സിറ്റിങ് ജഡ്‍ജിമാരും ടോള്‍ പ്ലാസയില്‍ തിരിച്ചറിയില്‍ രേഖകളുമായി കാത്തുനില്‍ക്കുന്നത് നാണക്കേടുണ്ടാക്കുന്നു - ഡിവിഷന്‍ ബഞ്ച് ജസ്റ്റിസുമാരായ ഹുലുവടി ജി രമേഷ്, എംവി മുരളീധരന്‍ എന്നിവര്‍ നിര്‍ദേശത്തില്‍ കുറിച്ചു.

ദേശീയതലത്തില്‍ നിര്‍ദേശം നടപ്പാക്കണമെന്നാണ് മദ്രാസ് ഹൈക്കോടതിയുടെ ആവശ്യം. ദേശീയപാത അതോറിറ്റി ഉള്‍പ്പെടെ ഇതുമായി ബന്ധപ്പെട്ട എല്ലാ ഏജന്‍സികള്‍ക്കും നോട്ടീസ് നല്‍കുമെന്നും കോടതി പറഞ്ഞു.

എല്ലാ ടോള്‍ പ്ലാസയിലും വിഐപികള്‍ക്ക് പ്രത്യേക വരി ഉണ്ടാക്കുന്നതിനുള്ള സര്‍ക്കുലര്‍ നല്‍കണം. വിഐപി, സിറ്റിങ് ജഡ്‍ജ്‍ വാഹനങ്ങള്‍ മാത്രമേ ഈ വരിയിലൂടെ കടത്തിവിടാന്‍ പാടുള്ളൂ. അനാവശ്യ ഉപദ്രവമാണ് ഇപ്പോള്‍ സഹിക്കുന്നതെന്നും ജഡ്‍ജിമാര്‍ പറഞ്ഞു.