അഭിമന്യുവിന്റെ സഹോദരി വിവാഹിതയായി: ചെലവുകൾ വഹിച്ചത് സിപിഎം

ഇടുക്കി: മഹാരാജാസ് ക്യാമ്പസിൽ പോപ്പുലർ ഫ്രണ്ടുകാർ കുത്തിക്കൊലപ്പെടുത്തിയ അഭിമന്യുവിന്റെ സഹാദരി കൌസല്ല്യ വിവാഹിതയായി. മന്ത്രി എം എം മണിയുടേയും മുതിർന്ന സിപിഎം നേതാക്കളുടെയും സാന്നിധ്യത്തിൽ വട്ടവടയിലായിരുന്നു വിവാഹം.

കോവിലൂർ സ്വദേശി മധുസൂദനനാണ് കൌസല്ല്യയുടെ കഴുത്തിൽ മിന്നുകെട്ടിയത്. നൂറുകണക്കിനാളുകളാണ് കൌസല്ല്യയുടെ വിവാഹത്തിൽ പങ്കെടുക്കാനായി സംസ്ഥാനത്തിന്റെ വിവിധ ഭാഗങ്ങളിൽനിന്നും എത്തിയത്.

ഓണത്തിനായിരുന്നു കൌസല്ല്യയുടെ വിവാഹം നടക്കേണ്ടിയിരുന്നത്. എന്നാൽ അഭിമന്യുവിന്റെ മരണത്തെത്തുടർന്ന് നീട്ടിവെയ്ക്കുകയായിരുന്നു. കോവിലൂരിൽ ജീപ്പ് ഡ്രൈവറാണ് മധുസൂദനൻ.

വിവാഹശേഷം വട്ടവടയിലെ സ്കൂൾ ഓഡിറ്റോറിയത്തിൽ അതിഥികൾക്ക് സദ്യവിളമ്പി. വിവാഹത്തിന്റെ ചെലവ് വഹിച്ചത് സിപിഎമ്മാണ്. അഭിമന്യുവിന്റെ കുടുംബത്തിന് സിപിഎം നിർമ്മിച്ച് നൽകുന്ന വീടിന്റെ നിർമ്മാണം അവസാനഘട്ടത്തിലാണ്.