കൊച്ചിയിൽ 200 കോടിയുടെ മയക്കുമരുന്ന്: മുഖ്യപ്രതി പിടിയിൽ

കൊച്ചി: നഗരത്തിൽ 200 കോടിയുടെ മയക്കുമരുന്ന് പിടികൂടിയ സംഭവത്തിൽ മുഖ്യപ്രതിയായ കണ്ണൂര്‍ സ്വദേശി പിടിയിൽ. എക്സൈസ് എൻഫോഴ്സ്‍‍മെന്‍റാണ് മുഖ്യപ്രതി പ്രശാന്തിനെ പിടികൂടിയത്. ഒരാഴ്ച മുൻപാണ് കൊച്ചിയിലെ പാഴ്‍‍സൽ കമ്പനിയിൽ നിന്ന് 32 കിലോ എംഡിഎംഎ (മെത്തലിൻ ഡയോക്സി മെത്തഫിറ്റമിൻ) പിടികൂടിയത്.

ലോകവ്യാപകമായി നിരോധിക്കപ്പെട്ട ലഹരിമരുന്നാണ് എംഡിഎംഎ. നഗരത്തിലെ ഒരു പാഴ്സൽ സര്‍വീസ് വഴി എട്ട് വലിയ പെട്ടികളിലാണ് മയക്കുമരുന്ന് കടത്താൻ ശ്രമിച്ചത്. പരിശോധനകളിൽ തെളിയാതിരക്കാൻ കറുത്ത ഫിലിമുകള്‍ കൊണ്ട് പൊതിഞ്ഞ ശേഷം തുണികള്‍ക്കിടയിൽ ഒളിപ്പിച്ചാണ് മയക്കുമരുന്ന് കടത്താൻ ശ്രമിച്ചത്. ഇത് രാജ്യത്ത ഏറ്റവും വലിയ മയക്കുമരുന്ന് വേട്ടകളിലൊന്നാണെന്ന് എക്സൈസ് ഡെപ്യൂട്ടി കമ്മീഷണര്‍ എ എസ് രഞ്ജിത് പറഞ്ഞിരുന്നു.