ഹിന്ദുക്കളെ കൊല്ലണമെന്ന് ഐ.എസില്‍ നിന്ന് മലയാള സന്ദേശം

കൊച്ചി: ഹിന്ദുക്കളെയും മുസ്ലിങ്ങളല്ലാത്തവരെയും കൊല്ലണമെന്ന് അഹ്വാനം ചെയ്യുന്ന ഇസ്ലാമിക് സ്റ്റേറ്റ് അനുഭാവിയുടെ ശബ്ദസന്ദേശം സോഷ്യല്‍ മീഡിയയില്‍ പ്രചരിക്കുന്നു.

മലയാളത്തിലുള്ള ശബ്ദസന്ദേശത്തിന് 10 മിനിറ്റ് 45 സെക്കന്‍റ് ദൈര്‍ഘ്യമുണ്ട്. ഇന്ത്യക്ക് പുറത്തുനിന്ന് ആണ് സന്ദേശം റെക്കോഡ് ചെയ്‍തിരിക്കുന്നതെന്നാണ് സൂചന.

ഇസ്ലാമിക് സ്റ്റേറ്റിനെ സഹായിക്കേണ്ടത് മലയാളികളായ മുസ്ലീങ്ങളുടെ ബാധ്യതയാണെന്നും ഖിലാഫത്തില്‍ ചേരാന്‍ എല്ലാവരും ശ്രമിക്കണമെന്നും അതിന് സാധിച്ചില്ലെങ്കില്‍ സാമ്പത്തികസഹായം നല്‍കണമെന്നും ആവശ്യപ്പെടുന്നു.

ഇസ്ലാമിക് സ്റ്റേറ്റിനെ സഹായിക്കണമെന്ന് തുടങ്ങുന്ന ഓഡിയോ പതുക്കെ മറ്റു മതങ്ങള്‍ക്ക് എതിരെയുളള വിദ്വേഷമായി മാറുകയാണ്.

"ബിംബങ്ങളെ ആരാധിക്കുന്ന ഹിന്ദുക്കളെ നിങ്ങള്‍ ഒന്നും ചെയ്യാത്തത് എന്തുകൊണ്ടാണ്... ഹിന്ദുക്കളുടെയും ക്രിസ്ത്യാനികളുടെയും നിയമങ്ങള്‍ പാടില്ല.. അവരെ കൊല്ലണം. ഇതിനായി പാശ്ചാത്യരാജ്യങ്ങളില്‍ നടക്കുന്ന ഇസ്ലാമിക് സ്റ്റേറ്റ് ആക്രമണങ്ങള്‍ മാതൃകയാണക്കണം" ഓഡിയോ ക്ലിപ്പില്‍ പറയുന്നു.

കാസര്‍ഗോഡ് നിന്നും ഇസ്ലാമിക് സ്‌റ്റേറ്റില്‍ എത്തിയ അബ്ദുള്‍ റാഷിദ് അബ്ദുള്ളയുടേതാണ് ഈ ശബ്ദസന്ദേശം എന്ന് സംശയിക്കുന്നതായി സൗത്ത് ലൈവ് റിപ്പോര്‍ട്ട് ചെയ്യുന്നു.

ഇസ്ലാമിക് സ്റ്റേറ്റുമായി ബന്ധപ്പെട്ട വിവിധ ആക്രമണങ്ങള്‍ പരാമര്‍ശിക്കുന്നതില്‍ ലാസ് വേഗസിലെ വെടിവെപ്പും ഇയാള്‍ വിശദീകരിക്കുന്നുണ്ട്. കഴിഞ്ഞ ഒക്ടോബര്‍ ഒന്നിനാണ് അമേരിക്കയിലെ ഉല്ലാസ നഗരമായ ലാസ് വേഗസില്‍ സംഗീത പരിപാടിക്കിടെ വെടിവെപ്പുണ്ടായത്. ഇതില്‍ നിന്നും അധികം പഴയതല്ല ഈ ഓഡിയോ ക്ലിപ് എന്ന് മനസിലാക്കാം.

അമ്പതാമത്തെ ഓഡിയോ ക്ലിപ് ആണ് ഇതെന്ന് പരിചയപ്പെടുത്തിയാണ് സന്ദേശം തുടങ്ങുന്നത്. ഏതെങ്കിലും വാട്ട്സാപ്പ് - സോഷ്യല്‍ മീഡിയ ഗ്രൂപ്പില്‍ ഷെയര്‍ ചെയ്‍ത വീഡിയോ ആകാനാണ് സാധ്യത. ഇതിന്‍റെ ആധികാരികത ഇതുവരെ ഉറപ്പുവരുത്താന്‍ കഴിഞ്ഞിട്ടില്ല.