മലയാളി യുവാവ് ഹൈദരാബാദിൽ വെട്ടേറ്റ് കൊല്ലപ്പെട്ട നിലയിൽ

ഹൈദരാബാദ്: മലയാളിയുവാവിനെ ഹൈദരാബാദിലെ താമസസ്ഥലത്ത് വെട്ടേറ്റ് മരിച്ച നിലയിൽ കണ്ടെത്തി. തൊടുപുഴ സ്വദേശിയായ അരുൺ പി ജോർജി (37) നെയാണ് സെക്കന്തരാബാദിനടുത്ത് രാംനഗറിലെ വീട്ടിൽ വെട്ടേറ്റു മരിച്ച നിലയിൽ കണ്ടെത്തിയത്.

ചെന്നൈ ആസ്ഥാനമായ സ്വകാര്യ കമ്പനിയുടെ ഹൈദരാബാദിലെ ശാഖാമാനേജർ ആയി പ്രവർത്തിച്ചു വരികയായിരുന്നു. ശനിയാഴ്ച രാത്രി ഒമ്പതോടെയാണ് അരുണിൻ്റെ മൃതദേഹം വീട്ടിലെ കുളിമുറിയിൽ കണ്ടെത്തിയത്.

ശനിയാഴ്ച നാട്ടിലേക്ക് വിമാനമാർഗം തിരിക്കാനിരുന്നതാണ് അരുൺ. എന്നാൽ, വൈകുന്നേരമായിട്ടും എത്താത്തതിനെ തുടർന്ന് വീട്ടുകാർ ഫോണിൽ ബന്ധപ്പെട്ടെങ്കിലും ലഭിച്ചില്ല. തുടർന്ന് സുഹൃത്തുക്കളെ വിളിച്ച് അന്വേഷിക്കാൻ പറയുകയായിരുന്നു.

തുടർന്ന് സുഹൃത്തുക്കൾ അരുൺ താമസിച്ചിരുന്ന വീട്ടിലെത്തി പൂട്ടുതകർത്ത് അകത്തു കടക്കുകയായിരുന്നു. അപ്പോഴാണ് കുളിമുറിയിൽ തലയ്ക്കും കഴുത്തിലും ആഴത്തിലുള്ള മുറിവേറ്റ് അരുൺ മരിച്ചു കിടക്കുന്നത് കണ്ടത്. അലമാര തുറന്ന നിലയിൽ ആയിരുന്നു.

തൊടുപുഴ പന്നൂര്‍ പറനിലയം വീട്ടില്‍ ജോര്‍ജിന്റെയും എല്‍സമ്മയുടെയും മകനാണ്. കൊലപാതകവുമായി ബന്ധപ്പെട്ട് മൂന്നുപേരെ പൊലീസ് കസ്റ്റഡിയിൽ എടുത്ത് ചോദ്യം ചെയ്തു വരികയാണ്. കൊലയാളികളെപ്പറ്റി സൂചന ലഭിച്ചെന്നാണ് റിപ്പോർട്ടുകൾ.

Malayali Youth killed in hyderabad

A malayali youth hail from Thodupuzha killed in Hyderabad