ഡല്‍ഹിയിലെ ക്യാമ്പില്‍ കഴിയുന്ന 115 മലയാളികള്‍ക്ക് കൊറോണയില്ല; കേരളത്തിലേക്ക് മടങ്ങാം: മന്ത്രി

തിരുവനന്തപുരം: ഡല്‍ഹിയിലെ ക്യാമ്പില്‍ കഴിയുന്ന 115 പേര്‍ മലയാളികളാണെന്ന് ആരോഗ്യമന്ത്രി കെ കെ ശൈലജ. അവര്‍ക്ക് കൊറോണ വൈറസ് ബാധ ഇല്ല. ഇക്കാര്യം കേന്ദ്ര ആരോഗ്യ കുടുംബക്ഷേമ മന്ത്രാലയം സംസ്ഥാന സര്‍ക്കാരിനെ അറിയിച്ചുവെന്ന് മന്ത്രി പറഞ്ഞു. ഫേസ്ബുക്ക് പോസ്റ്റിലൂടെ ആരോഗ്യമന്ത്രി അറിയിച്ചത്.

'ചൈനയില്‍ നിന്നും വിമാനമാര്‍ഗം തിരിച്ചെത്തിച്ച് ഡല്‍ഹിയിലെ രണ്ട് ക്യാമ്പുകളിലായി ഐസോലേഷനില്‍ കഴിയുന്നവരില്‍ 115 പേര്‍ കേരളത്തില്‍ നിന്നുള്ളവരാണെന്നും അവരുടെ പരിശോധനാ ഫലം നെഗറ്റീവാണെന്നും കേന്ദ്ര ആരോഗ്യ കുടുംബക്ഷേമ മന്ത്രാലയം സംസ്ഥാന സര്‍ക്കാരിനെ അറിയിച്ചിട്ടുണ്ട്. ആയതിനാല്‍ അവരെ 17ാം തീയതി വൈകുന്നേരം മുതല്‍ കേരളത്തിലേക്ക് മടങ്ങാന്‍ അനുവദിക്കുന്നതാണ്'.

ആരോഗ്യമന്ത്രി കെ കെ ശൈലജയുടെ ഫേസ്ബുക്ക് പോസ്റ്റ്:

'കേരളത്തില്‍ തിരിച്ചെത്തിയാലും മൊത്തം 28 ദിവസം അവര്‍ വീടുകളില്‍ ഐസോലേഷനില്‍ കഴിയേണ്ടതാണ്. ഇക്കാര്യത്തിലുള്ള സംശയ നിവാരണത്തിന് ജില്ല ആരോഗ്യ വകുപ്പ് അധികാരികളുമായി ബന്ധപ്പെടാവുന്നതാണ്', മന്ത്രി വ്യക്തമാക്കി.

'കേരളത്തില്‍ നിരീക്ഷണത്തില്‍ കഴിയുന്ന 42 വ്യക്തികളെ പരിഷ്‌കരിച്ച മാര്‍ഗരേഖ പ്രകാരം ഇന്ന് ഒഴിവാക്കിയിട്ടുണ്ട്. എങ്കിലും കൊറോണ വൈറസ് രോഗബാധയ്‌ക്കെതിരെ ജാഗ്രത തുടരുകയാണ്. രോഗബാധിത പ്രദേശങ്ങളില്‍ നിന്നും മടങ്ങിയെത്തിയവര്‍ 11ാം തീയതിയിലെ മാര്‍ഗനിര്‍ദ്ദേശങ്ങള്‍ പ്രകാരം വീടുകളില്‍ തന്നെ തുടരേണ്ടതും പൊതു ഇടങ്ങള്‍ സന്ദര്‍ശിക്കുന്നത് ഒഴിവാക്കേണ്ടതുമാണ്', മന്ത്രി കൂട്ടിച്ചേര്‍ത്തു.