എസ്എൻഡിപി ക്ഷേത്രങ്ങളിൽ ഇനി ഷര്‍ട്ടൂരാതെ പ്രവേശിക്കാം

മൂവാറ്റുപുഴ: ക്ഷേത്രങ്ങളിൽ പുരുഷന്മാര്‍ മേൽവസ്ത്രങ്ങള്‍ ഊരിമാറ്റിയ ശേഷം മാത്രമേ പ്രവേശിക്കാവൂ എന്ന ചട്ടം തിരുത്തി എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. മൂവാറ്റുപുഴ എസ്എൻഡിപി യൂണിയൻ്റെ ശ്രീകുമാര ഭജന ദേവസ്വം ക്ഷേത്രത്തിലാണ് പുരുഷന്മാര്‍ക്ക് ഷര്‍ട്ടും ബനിയനും ധരിച്ച് ക്ഷേത്രത്തിനുള്ളിൽ പ്രവേശിക്കാമെന്ന് വെള്ളാപ്പള്ളി പ്രഖ്യാപിച്ചത്. പ്രഖ്യാപനത്തിനു ശേഷം അദ്ദേഹം ഉടൻ തന്നെ പ്രഖ്യാപനം നടപ്പാക്കുകയും ചെയ്തു.

മന്ത്രവും തന്ത്രവും പറഞ്ഞ് ഭക്തരെ ചൂഷണം ചെയ്യുന്നവരെ തിരിച്ചറിഞ്ഞ് തിരസ്കരിക്കണം എന്നു പ്രഖ്യാപിച്ച ശേഷം പ്രസംഗം ഇടയ്ക്ക് നിര്‍ത്തി വെള്ളാപ്പള്ളി ക്ഷേത്രത്തിലേയ്ക്ക് പോവുകയായിരുന്നു. ഷര്‍ട്ടും ബനിയനും ധരിച്ച് ക്ഷേത്രത്തിൽ പ്രവേശിക്കരുതെന്ന് എഴുതിയ ബോര്‍ഡ് ഗോപുരനടയിൽ നിന്ന് എടുത്തു മാറ്റിയ വെള്ളാപ്പള്ളി തുടര്‍ന്ന് ക്ഷേത്രത്തിൽ പ്രവേശിച്ചു.

വെള്ളാപ്പള്ളിയ്ക്ക് പിന്നാലെ നൂറുകണക്കിന് ഭക്തരും മേൽവസ്ത്രം നീക്കാതെ ക്ഷേത്രത്തിനുള്ളിൽ പ്രവേശിച്ചു. എസ്എൻഡിപി യോഗത്തിനു കീഴിലുള്ള മുഴുവൻ ക്ഷേത്രങ്ങളിലും ഇനിമുതൽ പുരുഷന്മാര്‍ക്ക് ഷര്‍ട്ടൂരാതെ പ്രവേശിക്കാമെന്നും വെള്ളാപ്പള്ളി പ്രഖ്യാപിച്ചു.

ഏതു ശാസ്ത്രത്തിന്‍റെ പിൻബലത്തിലാണ് ഷര്‍ട്ട് ഊരി വച്ചു മാത്രമേ ക്ഷേത്രത്തിൽ പ്രവേശിക്കാവൂ എന്ന് തന്ത്രിമാര്‍ പറയുന്നതെന്ന് വെള്ളാപ്പള്ളി ചോദിച്ചു. കേരളത്തിലല്ലാതെ എവിടെയാണ് ഈ രീതിയുള്ളതെന്നും അദ്ദേഹം ചോദിച്ചു. തന്ത്രിമാരിൽ ഒരുവിഭാഗം ഭക്തരെ ചൂഷണം ചെയ്യാനായി അന്ധവിശ്വാസങ്ങളും അനാചാരങ്ങളും ഇപ്പോഴും കൊണ്ടുനടക്കുകയാണെന്നും ഇവയെ ചെറുക്കുകയും ഇല്ലാതാക്കുകയും ചെയ്യണമെന്നും വെള്ളാപ്പള്ളി പറഞ്ഞു.