സ്വയം ചിതയൊരുക്കി ഗൃഹനാഥൻ ആത്മഹത്യ ചെയ്തു

മാള: കനകക്കുന്നിൽ ഗൃഹനാഥൻ സ്വയം ചിതയൊരുക്കി ആത്മഹത്യ ചെയ്തു. ഇന്നലെ വൈകുന്നേരം അഞ്ചു മണിയോടെയാണ് മാണിയംപറമ്പിൽ പ്രകാശൻ(65) മരിച്ചതായി പുറത്തറിയുന്നത്. പ്രകാശൻ ആത്മഹത്യക്ക് ശ്രമിക്കുമ്പോൾ ആരും വീട്ടിലുണ്ടായിരുന്നില്ല.

പ്രകാശന്റെ ഭാര്യ ഗീതയും ഇളയ മകൾ പ്രിയയും കാക്കനാട് ഹിന്ദുസ്ഥാൻ ലാറ്റക്സിൽ ജീവനക്കാരാണ്. മൂത്തമകൾ ഭർത്താവിനോടൊപ്പം അമേരിക്കയിലാണ്. എറണാകുളത്ത് ഒരു ഫ്ലാറ്റിൽ താമസിക്കുന്ന കുടുംബം അടുത്ത ബന്ധുവിന്റെ കല്യാണത്തിന് സംബന്ധിക്കാനാണ് മാളയിലെ വീട്ടിലെത്തിയത്. ഇന്നലെ ഭാര്യയും ഇളയ മകളും ജോലിക്ക് പോയ ശേഷം വീട്ടിലാരുമില്ലാതിരുന്ന സമയത്താണ് പ്രകാശൻ ആത്മഹത്യ ചെയ്തത്. കത്തിക്കരിഞ്ഞ ശേഷം അവശേഷിക്കുന്ന ശരീരഭാഗങ്ങൾ പോലീസ് സൂക്ഷിച്ചിട്ടുണ്ട്. ആത്മഹത്യയുടെ കാരണം ബന്ധുക്കൾക്കോ പോലീസിനോ വ്യക്തമല്ല.

ചിതയൊരുക്കാനായി പ്രകാശൻ സ്വയം മണ്ണ് മാറ്റി കുഴിയൊരുക്കി, വിറകുകൾ അടുക്കി. മഴ പെയ്താൽ തീ അണഞ്ഞു പോകാതിരിക്കാൻ മുകളിൽ ഇരുമ്പുഷീറ്റുകൾ കൊണ്ട് മറ തീർത്തു. സമീപവാസികൾ പുക ഉയരുന്നത് കണ്ടെങ്കിലും ചപ്പുചവറുകൾ കൂട്ടിയിട്ട് കത്തിക്കുകയാണെന്നാണ് എല്ലാവരും വിചാരിച്ചത്. ഫോറൻസിക് അന്വേഷണത്തിന് ശേഷമേ പോലീസ് മേൽനടപടികൾ സ്വീകരിക്കൂ.