സുരേഷ് ഗോപിയുടെ എം.പി ഫണ്ട്: മറുപടിയുമായി എം.ബി രാജേഷ്

പാലക്കാട്: തന്നെക്കാള്‍ മൂന്നിരട്ടി തുക എം.പി ഫണ്ടില്‍നിന്ന് സുരേഷ് ഗോപി ചിലവഴിച്ചെന്ന പ്രചരണത്തിന് മറുപടിയുമായി എം.ബി രാജേഷ് എം.പി. തന്‍റെ ഫെയ്‍സ്ബുക്കിലാണ് ഇരുവരും ചിലവഴിച്ച തുകയുടെ കണക്കുമായി രാജേഷിന്‍റെ മറുപടി.

സുരേഷ് ഗോപിയുടെ എം.പി ഫണ്ടില്‍നിന്ന് വെറും 28 ലക്ഷം മാത്രമാണ് ചിലവായതെന്ന് രാജേഷ് പറയുന്നു. ഇത് വെറും 5.5 ശതമാനം മാത്രമാണ്. എന്നാല്‍ താന്‍ ഇക്കാലയളവില്‍ 77.17 ശതമാനം തുക ചിലവാക്കിയിട്ടുണ്ടെന്നാണ് രാജേഷ് പറയുന്നത്. സംഘപരിവാറുകാര്‍ തനിക്കെതിരെ നുണപ്രചരണം നടത്തുകയാണെന്നും അദ്ദേഹം ആരോപിക്കുന്നു.

എം.ബി രാജേഷിന്‍റെ ഫെയ്‍സ്ബുക്ക് പോസ്റ്റിന്‍റെ പൂര്‍ണരൂപം:

"സംഘി നുണ പ്രചരണത്തിലെ ഏറ്റവും പുതിയ മാതൃക. ഞാൻ ചിലവഴിച്ചതിനേക്കാൾ മൂന്നിരട്ടി അധികമായി എം.പി.ഫണ്ട് ശ്രീ.സുരേഷ് ഗോപി ചെലവാക്കിയെന്ന മുട്ടൻ നുണ പ്രചരിപ്പിക്കുന്നതായി സുഹൃത്തുക്കൾ ശ്രദ്ധയിൽപ്പെടുത്തുകയുണ്ടായി. എന്നാൽ വസ്തുത ഇതാണ്. മാസങ്ങൾക്ക് മുൻപ് ചുമതലയേറ്റ സുരേഷ് ഗോപിയുടെ എം.പി. ഫണ്ടിൽ നിന്നും ചെലവായിട്ടുള്ളത് വെറും 28 ലക്ഷം രൂപ മാത്രമാണ്. അതായത് വെറും 5.5 ശതമാനം മാത്രം! ഇപ്പോഴത്തെ കണക്ക് പ്രകാരം 77.17% തുക എന്റെ എം.പി.ഫണ്ടിൽ നിന്നും ചെലവഴിക്കപ്പെട്ടു കഴിഞ്ഞിട്ടുണ്ട്. കഴിഞ്ഞ ടേമിൽ നൂറു ശതമാനം തുകയും ചെലവഴിച്ചിട്ടുമുണ്ട്. സുരേഷ് ഗോപി എം.പി.ഫണ്ട് 5 % മാത്രമേ ചെലവഴിച്ചിട്ടുള്ളൂ എന്നത് ചൂണ്ടിക്കാണിക്കാനോ, അതിന്റെ പേരിൽ അദ്ദേഹത്തെ ചെറുതായി കാണിക്കാനോ ആഗ്രഹിക്കുന്നില്ല.അദ്ദേഹത്തെ മുൻനിർത്തി അദ്ദേഹത്തിന്റെ അനുയായികൾ നടത്തുന്ന വ്യാജപ്രചരണത്തെ തുറന്ന് കാണിക്കാൻ നിർബന്ധിതനായെന്ന് മാത്രം."



MB Rajesh MP replied to news that Suresh Gopi MP spent 5 times more amount from MP fund than that of him.