പ്രളയത്തില്‍ വീട് നഷ്ടപ്പെട്ടവരുടെ യോഗം കൊച്ചിയില്‍ നടക്കും

കൊച്ചി: പ്രളയത്തില്‍ വീട് പൂര്‍ണമായും നഷ്ടപ്പെട്ടവരുടെയും ജനപ്രതിനിധികളുടെയും യോഗം ജില്ലാ കളക്ടറുടെ നേതൃത്വത്തില്‍ എറണാകുളം ജില്ലയിലെ വിവിധ പഞ്ചായത്തുകളില്‍ നടക്കും. പ്രളയദുരിതാശ്വാവുമായി ബന്ധപ്പെട്ട പരാതികള്‍ ജനങ്ങള്‍ക്ക് കളക്ടറെ നേരിട്ട് അറിയിക്കാം. റീ ബില്‍ഡ് സര്‍വേയുമായി ബന്ധപ്പെട്ട പരാതികളും അറിയിക്കാം. 13 മുതല്‍ 19 വരെയാണ് യോഗങ്ങള്‍ ചേരുന്നത്.

13ന് വൈകീട്ട് നാലിന് കുന്നുകര പഞ്ചായത്ത് ഹാളില്‍ കുന്നുകര പഞ്ചായത്തിലെ യോഗം ചേരും. വൈകീട്ട് അഞ്ചിന് ആലങ്ങാട് ഗ്രാമപഞ്ചായത്ത് ഹാളില്‍ ആലങ്ങാട് ഗ്രാമപഞ്ചായത്ത്, ഏലൂര്‍ മുനിസിപ്പാലിറ്റി, കളമശേരി മുനിസിപ്പാലിറ്റി എന്നിവിടങ്ങളിലെ യോഗങ്ങള്‍ നടക്കും. 15 ന് വൈകീട്ട് അഞ്ചിന് പുത്തന്‍വേലിക്കര പഞ്ചായത്ത് ഹാളില്‍ പുത്തന്‍വേലിക്കര ഗ്രാമപഞ്ചായത്ത്, 19 ന് വൈകീട്ട് നാലിന് അങ്കമാലി ബ്ലോക്ക് പഞ്ചായത്ത് ഹാളില്‍ അങ്കമാലി മുനിസിപ്പാലിറ്റി, പാറക്കടവ് അയ്യമ്പുഴ, കാലടി, മലയാറ്റൂര്‍, മഞ്ഞപ്ര, മൂക്കന്നൂര്‍ , കറുകുറ്റി, തുറവൂര്‍ എന്നീ പഞ്ചായത്തുകളുടെ യോഗം നടക്കും.

19 ന് വൈകീട്ട് 6ന് ചെങ്ങമനാട് പഞ്ചായത്ത് ഹാളില്‍ നെടുമ്പാശ്ശേരി, ചെങ്ങമനാട്, കാഞ്ഞൂര്‍, ശ്രീ മൂലനഗരം പഞ്ചായത്തുകളുടെയും, വൈകീട്ട് 7ന് ചൂര്‍ണിക്കര പഞ്ചായത്ത് ഹാളില്‍ ആലുവ മുനിസിപ്പാലിറ്റി, ഇടത്തല ഗ്രാമപഞ്ചായത്ത്, കീഴ്മാട് ഗ്രാമപഞ്ചായത്ത്, ചൂര്‍ണിക്കര പഞ്ചായത്ത് എന്നീ യോഗങ്ങളും നടക്കും. ഇതുവരെ 650 കുടുംബങ്ങള്‍ ധനസഹായത്തിന്റെ ആദ്യ ഗഡു കൈപ്പറ്റി. വീടുകള്‍ പൂര്‍ണമായും തകര്‍ന്നവര്‍ക്ക് പുനരുദ്ധാരണ പ്രവര്‍ത്തനങ്ങള്‍ക്കായി 4 ലക്ഷം രൂപയാണ് സര്‍ക്കാര്‍ ധനസഹായം. ഇതില്‍ ആദ്യ ഗഡുവായി 95100 രൂപയാണ് നല്‍കുന്നത്.