ചാത്തന്നൂർ എൽപി സ്‌കൂളിന് 'മെട്രോ മാന്‍റെ' സമ്മാനം: പുതിയ ക്ലാസ് മുറികൾ

കോഴിക്കോട്: കൊച്ചി മെട്രൊയുടെ ഉദ്ഘാടനം നാളെ നടക്കാനിരിക്കെ 'മെട്രോ മാൻ' എന്ന് വിളിപ്പേരുള്ള ഇ.ശ്രീധരൻ മറ്റൊരു സന്തോഷത്തിലാണ്. അത് മറ്റൊന്നുമല്ല, താന്‍ പഠിച്ച ചാത്തന്നൂര്‍ സർക്കാർ എല്‍.പി സ്കൂളിന് ക്ലാസ് മുറികള്‍ നിർമിച്ച് നൽകാൻ കഴിഞ്ഞതിലുള്ള സന്തോഷം.

സംസ്ഥാന സർക്കാർ അനുവദിച്ച 20 ലക്ഷം രൂപ ഉപയോഗിച്ചാണ് ഡി.എം.ആര്‍.സിയുടെ സഹായത്തിൽ ക്ലാസ് മുറികളുടെ നിർമിച്ചത്. ധനമന്ത്രി തോമസ് ഐസക്കാണ് തന്‍റെ ഫേസ്ബുക് പേജിലൂടെയാണ് ഇക്കാര്യം അറിയിച്ചത്. രണ്ടര മാസം കൊണ്ടാണ് പണി പൂർത്തിയാക്കിയതെന്നും തോമസ് ഐസക് പോസ്റ്റിൽ പറയുന്നു.

പോസ്റ്റിന്‍റെ പൂർണരൂപം:

ഇ ശ്രീധരന്റെ സന്ദര്‍ശനത്തിന് സമയം ചോദിച്ചത് കാലത്ത് 8 മണിക്കായിരുന്നു . അദ്ദേഹം കൃത്യസമയത്ത് ഓഫീസില്‍ എത്തി . ഞാന്‍ 10 മിനിറ്റ് വൈകിയും . സന്തോഷം പറയാന്‍ വന്നതാണ് എന്നദ്ദേഹം പറഞ്ഞപ്പോള്‍ ഞാന്‍ വിചാരിച്ചു കൊച്ചി മെട്രോയെ കുറിച്ചായിരിക്കും എന്ന്. പക്ഷെ അദ്ദേഹത്തിന് പറയാന്‍ ഉണ്ടായിരുന്നത് താന്‍ പഠിച്ച പട്ടാമ്പിക്കടുത്ത ചാതന്നൂര്‍ ഗവ. എല്‍ പി സ്ക്കൂളിനെ കുറിച്ചായിരുന്നു . അവിടെ രണ്ടു ക്ലാസ് മുറികള്‍ പണിയാന്‍ 20 ലക്ഷം രൂപ സര്‍ക്കാര്‍ അനുവദിച്ചിരുന്നു.

ഇ ശ്രീധരന്‍ പഠിച്ച സ്കൂള്‍ ആണെന്നതറിയാതെ ഡി എം ആര്‍ സി വഴി ഈ പ്രവൃത്തി ചെയ്യാനുള്ള അനുമതി സര്‍ക്കാര്‍ ഉദ്യോഗസ്ഥര്‍ നിഷേധിച്ചു . അങ്ങിനെയാണ് അദ്ധേഹം എന്‍റെയടുത്ത് വന്നത് . ഇപ്പോള്‍ അനുമതി കിട്ടിയാല്‍ മഴയ്ക്ക് മുന്‍പ് പണി തീര്‍ക്കാമെന്നായിരുന്നു എന്നദ്ദേഹം അന്ന് പറഞ്ഞത്. സാങ്കേതിക വൈതരണി മറികടക്കാന്‍ ക്യാബിനറ്റില്‍ കൊണ്ട് പോയി തീരുമാനം സര്‍ക്കാര്‍ തീരുമാനം മാറ്റിയെടുത്തു.

ഇത്രയും വിവരങ്ങള്‍ ഞാന്‍ മുന്‍പൊരു പോസ്റ്റില്‍ സൂചിപ്പിച്ചിരുന്നല്ലോ .
അന്ന് പറഞ്ഞ വാക്ക് അദ്ദേഹം കൃത്യമായി പാലിച്ചു. രണ്ടരമാസമേ എടുത്തുള്ളൂ, മഴയ്ക്ക് മുന്‍പ് കെട്ടിടം പണി പൂര്‍ത്തിയാക്കി ക്ലാസ് മുറികളില്‍ പഠിത്തവും തുടങ്ങി . ഇപ്പോള്‍ 254 കുട്ടികള്‍ പഠിക്കുന്നു.
4 ഡിവിഷനുകളിലും കിന്‍ഡര്‍ ഗാര്‍ട്ടനിലുമായി.

ഈ വര്‍ഷം 40 കുട്ടികള്‍ ആണത്രേ വര്‍ദ്ധിച്ചിരിക്കുന്നത് . അതിലുള്ള സന്തോഷം ശ്രീധരന്‍ മറച്ചു വച്ചില്ല . താന്‍ പഠിച്ച എല്‍ പി സ്കൂളിലെ രണ്ടു ക്ലാസ് മുറികള്‍ പൂര്‍ത്തീകരിച്ച കാര്യം പറയാന്‍ വേണ്ടി മാത്രം എന്നെ വന്നു കണ്ട മെട്രോമാന്‍ എന്നെ വീഴ്ത്തിക്കളഞ്ഞു.



'Metro Man' gifts new classrooms to Chathannoor L P School

E Sreedharan constructed new classrooms for the L P School where he studied says FB post by Thomas Issac.