കുടുംബശ്രീ സിഡിഎസ്സുകള്‍ക്ക് 2 കോടി രൂപ മൈക്രോ ക്രെഡിറ്റ് വായ്പ

തിരുവനന്തപുരം: കേരള സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍ കടുംബശ്രീ സി.ഡി.എസ്-കളില്‍ നിന്നും മൈക്രോ ക്രെഡിറ്റ് വായ്പയ്ക്ക് അപേക്ഷ ക്ഷണിക്കുന്നു. ഒരു കുടുംബശ്രീ സി.ഡി.എസ്സിന് പരമാവധി രണ്ട് കോടി രൂപ വരെയാണ് വ്യവസ്ഥകള്‍ക്ക് വിധേയമായി വായ്പ അനുവദിക്കുന്നത്. 75 ശതമാനമെങ്കിലും ഒ.ബി.സി. അല്ലെങ്കില്‍ മതന്യൂനപക്ഷ വിഭാഗത്തില്‍പ്പെട്ട (മുസ്‌ളീം, ക്രിസ്ത്യന്‍, പാഴ്‌സി, ജൈന, ബുദ്ധ, സിക്ക്) അംഗങ്ങളുള്ള അയല്‍ക്കൂട്ടങ്ങള്‍, JLG കള്‍ എന്നിവയ്ക്കാണ് വായ്പാ വിതരണം ചെയ്യേണ്ടത്.

വരുമാനദായകമായ ഏതെങ്കിലും നിയമാനുസൃത വ്യക്തിഗത / ഗ്രൂപ്പ് സംരംഭങ്ങള്‍ ആരംഭിക്കുന്നതിന് വായ്പ വിനിയോഗിക്കേണ്ടതാണ്. അയല്‍ക്കൂട്ടങ്ങള്‍ക്ക് പരമാവധി 5 ലക്ഷം രൂപവരെയും JLG കള്‍ക്ക് 2.50 ലക്ഷം രൂപവരെയും വായ്പ അനുവദിക്കാവുന്നതാണ്. വ്യക്തിഗത ഗുണഭോക്താവിന്റെ വായ്പാ പരിധി 60,000/- രൂപയാണ്. സി.ഡി.എസ്സ്-ന് 2.5 മുതല്‍ 3.5 ശതമാനം വരെ വാര്‍ഷിക പലിശ നിരക്കില്‍ അനുവദിക്കുന്ന വായ്പ അയല്‍ക്കൂട്ടങ്ങള്‍ക്ക് / JLG കള്‍/വ്യക്തിഗത ഗുണഭോക്താക്കള്‍ എന്നിവര്‍ക്ക് 4% മുതല്‍ 5% വരെ പലിശ നിരക്കില്‍ വിതരണം ചെയ്യേണ്ടതാണ്. തിരിച്ചടവ് കാലാവധി 36 മാസം.

പ്രാഥമിക അപേക്ഷയും പദ്ധതിയുടെ വിശദാംശങ്ങളും www.ksbcdc.com എന്ന വെബ്‌സൈറ്റില്‍ ലഭ്യമാണ്. പ്രാഥമിക അപേക്ഷ കോര്‍പ്പറേഷന്റെ ജില്ലാ / ഉപജില്ലാ ഓഫീസുകളില്‍ 2019 ജനുവരി 19 നകം സമര്‍പ്പിക്കേണ്ടതാണ്. പ്രാഥമിക അപേക്ഷ പരിശോധിച്ച് അര്‍ഹരാണെന്ന് കണ്ടെത്തുന്ന സി.ഡി.എസ്സുകളെ പദ്ധതി സംബന്ധിച്ച് വിശദീകരണവും വിശദമായ അപേക്ഷ ഓണ്‍ലൈനില്‍ സമര്‍പ്പിക്കുന്നതിനുള്ള മാര്‍ഗ്ഗ നിര്‍ദ്ദേശവും നല്‍കുന്നതിനായി സംഘടിപ്പിക്കുന്ന ശില്പശാലയിലേയ്ക്ക് ക്ഷണിക്കുന്നതാണ്. ശില്പശാലയില്‍ വെച്ച് ഓണ്‍ലൈന്‍ അപേക്ഷ സമര്‍പ്പിക്കുന്നതിനുള്ള User name, Password എന്നിവ ബന്ധപ്പെട്ടവര്‍ക്ക് നല്‍കുന്നതാണ്. ഈ സാമ്പത്തിക വര്‍ഷം 100 കോടി രൂപ മൈക്രോ ക്രെഡിറ്റ് വായ്പാ വിതരണമാണ് കോര്‍പ്പറേഷന്‍ ലക്ഷ്യമിടുന്നത്.