ഇടുക്കിയിൽ മണ്ണിടിഞ്ഞ് വീണ് ഇതരസംസ്ഥാന തൊഴിലാളി മരിച്ചു

ഇടുക്കി: ആനച്ചാലിൽ സംരക്ഷണ ഭിത്തി നിർമിക്കുന്നതിനിടെ ഇതരസംസ്ഥാന തൊഴിലാളി മണ്ണിടിഞ്ഞ് വീണ് മരിച്ചു. അപകടത്തിൽ രണ്ടു പേർക്ക് പരിക്കേറ്റു. ആനച്ചാൽ ടൗണിൽ പെട്രോൾ പമ്പിന് സമീപം പില്ലറെടുക്കുന്നതിനിടെയാണ് മൺതിട്ട ഇടിഞ്ഞു വീണ് അപകടമുണ്ടായത്.

പശ്ചിമ ബംഗാൾ സ്വദേശി മക് സാദിഖുൾ ഹഖാണ് മണ്ണിനടിയിൽപ്പെട്ട് മരിച്ചത്. ഹഖിന്റെ മൃതദേശം അടിമാലി താലൂക്ക് ആശുപത്രിയിൽ സൂക്ഷിച്ചിരിക്കുകയാണ്. നാളെ പോസ്റ്റുമോർട്ടം നടത്തിയ ശേഷം മൃതദേഹം പശ്ചിമ ബംഗാളിലേക്ക് കൊണ്ട് പോകും.

ശബ്‌ദം കേട്ട് ഓടിയെത്തിയ നാട്ടുകാർ രണ്ടു ഇതരസംസ്ഥാന തൊഴിലാളികളെ മണ്ണിനടിയിൽ നിന്ന് രക്ഷിച്ചു. മണ്ണ് മാന്തി ഉപയോഗിച്ച് അടുത്തയാൾ മണ്ണിനടിയിൽ നിന്നും പുറത്തെടുക്കാൻ ശ്രമിച്ചെങ്കിലും ജീവൻ രക്ഷിക്കാനായില്ല.

നാട്ടുകാർ രക്ഷിച്ച തൊഴിലാളികളാണ് മണ്ണിനടിയിൽ ഒരാൾ അകപ്പെട്ട കാര്യം അറിയിച്ചത്. കഴിഞ്ഞ പ്രളയത്തിൽ ഈ ഭാഗത്ത് കനത്ത മണ്ണിടിച്ചിൽ ഉണ്ടായിരുന്നു. റവന്യൂ വകുപ്പിന്റെ അനുമതിയില്ലാതെയാണ് ഇവടെ നിർമാണ പ്രവർത്തനം നടത്തിയതെന്ന ആരോപണവുമുണ്ട്.