വനിതാ മതില്‍: സര്‍ക്കാരിന് വാശിയോ നിര്‍ബന്ധമോയില്ലെന്ന് കടകംപള്ളി

കൊച്ചി: നവോത്ഥാന മൂല്യങ്ങല്‍ സംരക്ഷിക്കാനുള്ള വനിതാ മതിലില്‍ സര്‍ക്കാരിന് വാശിയോ നിര്‍ബന്ധമോ ഇല്ലെന്ന് മന്ത്രി കടകംപള്ളി സുരേന്ദ്രന്‍. വനിതാ മതിലില്‍ പങ്കെടുക്കാന്‍ ആരെയും നിര്‍ബന്ധിക്കില്ലെന്നും മന്ത്രി പറഞ്ഞു.

സര്‍ക്കാര്‍ ജീവനക്കാര്‍ക്ക് വനിതാ മതിലില്‍ പങ്കെടുക്കാം. വനിതാ മതില്‍ സംബന്ധിച്ച് ആര്‍ക്കും നിര്‍ദ്ദേശം നല്‍കിയിട്ടില്ലെന്നും മന്ത്രി കൂട്ടിച്ചേര്‍ത്തു.

അതേസമയം ശബരിമലയില്‍ ആക്രമികള്‍ തമ്പടിച്ചിരിക്കുകയാണ്. ഈ സാഹചര്യത്തിലാണ് നിരോധനാജ്ഞ പിന്‍വലിക്കാതിരിക്കുന്നത്. അവര്‍ അവസരം നോക്കിയിരിക്കുകയാണെന്നും പോലീസ് പരിശോധനയ്ക്കു ശേഷം ഇക്കാര്യത്തില്‍ തീരുമാനം അറിയിക്കുമെന്നും മന്ത്രി വ്യക്തമാക്കി.

വനിതാ മതിലിനെതിരെ രൂക്ഷ വിമര്‍ശനവുമായി പ്രതിപക്ഷ നേതാവ് രമേഷ് ചെന്നിത്തല രംഗത്തെത്തി. വനിതാ മതിൽ വര്‍ഗീയ മതിലാണെന്ന് ആരോപിച്ചാണ് ചെന്നിത്തല രംഗത്തെത്തിയത്. ഹിന്ദുസംഘടനകളെ മാത്രം പങ്കെടുപ്പിച്ചുകൊണ്ടുള്ള മതിൽ സംസ്ഥാനത്തിന്‍റെ മതേതര മൂല്യങ്ങള്‍ തകര്‍ക്കുമെന്നും ചെന്നിത്തല പറഞ്ഞു.