ഇടുക്കി ഡാം ഒറ്റയടിയ്ക്ക് തുറന്നു വിടില്ലെന്ന് വൈദ്യുതിമന്ത്രി മണി

തിരുവനന്തപുരം: ഇടുക്കി അണക്കെട്ടിലെ വെള്ളം ഒറ്റയടിയ്ക്ക് തുറന്ന് വിടില്ലെന്ന് വൈദ്യുതിവകുപ്പ് മന്ത്രി എംഎം മണി. ജലനിരപ്പ് 2397 അടി എത്തുമ്പോള്‍ അടുത്ത ജാഗ്രതാനിര്‍ദേശം നല്‍കുമെന്നും തുടര്‍ന്ന് ഘട്ടം ഘട്ടമായി വെള്ളം തുറന്നു വിടുമെന്നും മന്ത്രി വ്യക്തമാക്കി.

ജലനിരപ്പ് 2397 അടി അല്ലെങ്കിൽ 2398 അടി എത്തുമ്പോഴായിരിക്കും ഘട്ടറുകള്‍ തുറക്കുക. ഓരോ ഘട്ടത്തിലും മുന്നറിയിപ്പുകള്‍ നല്‍കും.

ആശങ്കപ്പെടേണ്ട സാഹചര്യമില്ലെന്നും എല്ലാ മുൻകരുതലുകളും സ്വീകരിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു. മേഖലയിൽ ദ്രുതകര്‍മസേനയെ വിന്യസിച്ചിട്ടുണ്ടെന്നും മന്ത്രി വ്യക്തമാക്കി. ഒറ്റയടിയ്ക്ക് ഡാം തുറക്കുന്നത് വലിയ ദുരന്തത്തിന് കാരണമാകും. എറണാകുളം, ഇടുക്കി ജില്ലകളിലുള്ള ജനങ്ങള്‍ക്ക് ബുദ്ധിമുട്ടുണ്ടാകാത്ത വിധത്തിലാകണം കാര്യങ്ങള്‍ നടപ്പിലാക്കേണ്ടതെന്നും അതിനായി നിര്‍ദേശം നല്‍കിയിട്ടുണ്ടെന്നും മന്ത്രി അറിയിച്ചു.

ഡാമിലെ ജലനിരപ്പ് 2395 അടിയായി വര്‍ധിച്ചതോടെ ഇന്നലെ രാത്രി ഓറഞ്ച് അലര്‍ട്ട് നൽകിയിരുന്നു.